بدعنوانی قومی ترقی دی راہ اچ وݙی رکاوٹ، سرکاری وسائل دا شفاف استعمال ہی پائیدار ترقی دا ضامن اے، سپیکر قومی اسمبلی

اسلام آباد۔ 9 دسمبر(اے پی پی)سپیکر قومی اسمبلی سردار ایاز صادق آکھیے جو بدعنوانی قومی ترقی دی راہ اچ ساریاں توں وݙی رکاوٹ اے، سرکاری وسائل دا شفاف استعمال ہی پائیدار ترقی دا ضامن اے۔ اے ڳالھ انہاں مالی بدعنوانی دے عالمی ݙینھ دے موقع تے اپنڑے سنیہے اچ آکھی اے۔ سپیکر قومی اسمبلی آکھیا جو پارلیمنٹ اَتے قومی اسمبلی کرپشن دے مکمل خاتمے کیتے پُرعزم ہین، شفافیت، احتساب اَتے قانون دی بالادستی مضبوط جمہوریت دیاں بنیاداں ہین، کرپشن دے خلاف قومی شعور بیدار کرݨ اساں ساریاں دی سانجھی ذمہ داری اے۔ انہاں آکھیا جو کرپشن فری پاکستان کیتے اداریاں اَتے عوام کوں ہکو سواں کردار ادا کرݨے، قومی اسمبلی بدعنوانی دے خلاف موثر قانون سازی کیتے سرگرم اے۔