پاکستان علاقائی و عالمی امن اَتے بقائے باہمی چاہندے، 1971 اچ پاک بحریہ دے افسراں قومی تاریخ کوں ہمیشہ کیتے امر کر ݙتے، وزیراعظم شہباز شریف دا ’’ہنگور ݙینھ‘‘ تے سنیہا

اسلام آباد۔ 9 دسمبر (اے پی پی)وزیراعظم محمد شہباز شریف آکھیے جو پاکستان علاقائی و عالمی امن اَتے بقائے باہمی چاہندے، 1971 اچ پاک بحریہ دے افسراں قومی تاریخ کوں ہمیشہ کیتے امر کر ݙتے۔ منگل کوں پاک بحریہ دے یادگار “ہنگور ݙینھ” تے سنیہے اچ وزیراعظم آکھیا جو 9 دسمبر 1971ء کوں پاک بحریہ دی آبدوز ہنگور اپݨے افسراں اَتے عملے دی قیادت اچ بے مثال کارکردگی نال پاکستان دے دفاع کوں ناقابل تسخیر ثابت کیتا ہا، پاکستانی قوم کوں پاک بحریہ دے افسراں اَتے عملے اَتے ہنگور آبدوز ڄھیں ٻہوں ان مل ترکیاں تے ماݨ اے۔ انہاں آکھیا جو پاک بحریہ ہمیشہ تاریخ اچ بزدل دشمن دے لکیے ہوئے وار کوں مکمل بے باک اَتے بے مثل کارکردگی نال ناکام بݨا تے اپݨے ملک دی عزت و تکریم اچ ودھارا کیتے۔ پاکستان ہمیشہ توں علاقائی اَتے بین الاقوامی امن اَتے بقائے باہمی چاہندے اَتے ایںدے نال دفاع وطن کوں مضبوط، مستحکم اَتے محفوظ رکھݨ دا غیر متزلزل عزم رکھدے۔ انہاں آکھیا جو 9 دسمبر دا ݙینھ دشمن کوں یاد ݙیواوݨ کیتے کافی اے جو پاکستان دیاں آبی سرحداں آہنی ہتھاں اچ ہن۔