پاکستان اَتے انڈونیشیا دا تجارت، تعلیم، صحت، زراعت، سائنس، انفارمیشن ٹیکنالوجی اَتے ٻئے شعبیاں اچ تعاون ٻیا ودھاوݨ تے اتفاق

اسلام آباد۔ 9 دسمبر(اے پی پی)پاکستان اَتے انڈونیشیا تجارت، تعلیم، صحت، زراعت، سائنس، انفارمیشن ٹیکنالوجی اَتے ٻئے شعبیاں اچ تعاون ٻیا ودھاوݨ تے اتفاق کیتے۔ وزیراعظم محمد شہباز شریف آکھیے جو انڈونیشیا دے صدر نال ملاقات ٻہوں مثبت اَتے تعمیری رہی اے، انہاں دے دورے نال ݙوطرفہ تعلقات مزید بلندیاں تئیں پڄسن، ݙوہیں ملکاں دے تعلقات ہر آزمائش تے پورا آئن، عالمی اَتے علاقائی امور تے ݙوہیں ملکاں دے خیالات ہکو جھئیں ہین۔ انڈونیشیا دے صدر پرابووو سوبیانتو آکھیا جو پاکستان ولوں صحت دے شعبے اچ تعاون دا خیرمقدم کریندے ہیں، تعلیم، تجارت، زراعت، انفارمیشن ٹیکنالوجی سودھا مختلف شعبیاں اچ تعاون کوں ٻیا تکڑا کریسوں۔

منگل کوں پاکستان اَتے انڈونیشیا وچال معاہدیاں اَتے مفاہمت دی یاداشتاں دیاں دستاویزات دے تبادلے دی تقریب اچ الیندے وزیراعظم محمد شہباز شریف آکھیا جو صدر پرابووو سوبیانتو انڈونیشیا دے مدبر رہنما ہن، انڈونیشیا دے کہیں وی صدر دا ست سال بعد پاکستان دا اے پہلا دورہ اے، ساݙے تعلقات 75 سال پُراݨے ہن، ݙوہیں ملکاں دے تعلقات ہر آزمائش تے پورا اُترین۔ انہاں آکھیا جو پاکستان اَتے انڈونیشیا ݙوطرفہ تجارت دے ودھارے کیتے پُرعزم ہن، ݙوطرفہ تجارت دا حجم ایں ویلھے4.5 ارب ڈالر اے جیںدے اچوں 90 فیصد تجارت انڈونیشیا توں پاکستان کیتے پام آئل دی درآمد دی اے۔ اساں ملاقات اچ پاکستان توں زرعی برآمدات اچ ودھارے، آئی ٹی دے شعبے دی ترقی دے اقدامات اَتے ٻئے شعبیاں اچ تعاون ودھاوݨ تے الائے، پاکستان انڈونیشیا دیاں میڈیکل یونیورسٹیاں اَتے ہسپتالاں دیاں ضرورتاں پوریاں کرݨ کیتے ڈاکٹرز، ڈینٹسٹ، میڈیکل پروفیسرز اَتے ٻئے طبی ماہرین بھیجواوݨ کیتے تیار اے۔ وزیراعظم آکھیا جو بانی پاکستان قائد اعظم محمد علی جناح انڈونیشیا دی آزادی دی تحریک دی حمایت کیتی ہائی،1965 دی جنگ اچ انڈونیشیا چٹان وانگوں پاکستان دے نال کھڑا رہیا ہائی اَتے انڈونیشیا دی حکومت اَتے عوام 1965 دی جنگ اچ پاکستان دے نال ودھ یکجہتی کیتی ہائی۔ انہاں آکھیا جو پاکستان اَتے انڈونیشیا دے تعلقات ویلھے نال مزید مستحکم تھیسن، سارے عالمی اَتے علاقائی امور تے ݙوہیں ملکاں دے خیالات ہکو سویں ہین۔ عالمی امور دے حوالے نال وزیراعظم غزہ تے انڈونیشیا دے موقف کوں سراہے اَتے آکھیا جو ویلھا آگئے جو عالمی برادری غزہ اچ خونریزی رکواوݨ کیتے کردار ادا کرے، غزہ اچ اسرائیل ولوں جنگ بندی دی خلاف ورزیاں قابل مذمت ہین۔ انڈونیشیا دے صدر دے دورے نال ݙوہیں ملکاں دے تعلقات ودھ تکڑے تھیسن۔

انڈونیشیا دے صدر پرابووو سوبیانتو آکھیا جو بھرپور مہمان نوازی اَتے استقبال تے وزیراعظم محمد شہباز شریف اَتے پاکستان دے عوام دے شکر گزار ہیں۔ وزیراعظم شہباز شریف نال ملاقات اچ مختلف شعبیاں اچ تعلقات کوں ودھاوݨ تے ڳالھ تھئی اے، پاکستان اَتے انڈونیشیا ݙو وݙے اسلامی ملک ہین، پاکستان دی فضائی حدود اچ جے ایف 17 تھنڈر طیاریاں دی سلامی میݙے کیتے وݙے ماݨ دی ڳالھ اے۔ انہاں آکھیا جو ݙوہیں ملکاں دے برادرانہ تعلقات ویلھے نال نال مزید مضبوط تھیسن، انڈونیشیا دے صحت دے شعبے کیتے پاکستان توں ڈاکٹرز، میڈیکل پروفیسرز اَتے ماہرین ٻھڄواوݨ نال ساکوں ٻہوں فائدہ تھیسی، اساں مختلف شعبیاں اچ تعاون دے حوالے نال معاہدیاں اَتے مفاہمت دیاں یاداشتاں دا تبادلہ کیتے۔ پاکستان ولوں صحت دے شعبے اچ تعاون دا خیر مقدم کریندے ہیں، تجارت، تعلیم، زراعت، سائنس و ٹیکنالوجی، صحت، ٹیکنالوجی اَتے ٻئے شعبیاں اچ تعلقات اچ مزید بہتری آوݨی چاہیدی اے۔ انڈونیشیا دے صدر آکھیا جو انہاں اپݨے وزارء کوں ہدایت کیتی اے جو او پاکستان دے نال مختلف شعبیاں اچ عملی تعاون دی رفتار کوں تیز کرن۔انہاں آکھیا جو فلسطین اَتے ٻئے مختلف عالمی امور تے ساݙے خیالات ہکو جھیں ہین، ݙوہیں ملکاں دے وزراء خارجہ ہک ݙوجھے دے نال قریبی رابطے اچ رہندن، غزہ دے معاملے تے ساݙا موقف ہک اے۔ انہاں ݙو ریاستی حل کیتے انڈونیشیا دے موقف دا اعادہ کیتا۔ انڈونیشیا دے صدر وزیراعظم شہباز شریف کوں اپݨے ملک دے دورے دی دعوت وی ݙتی۔ ایں توں پہلے ݙوہیں ملکاں وچال تجارت، تعلیم اَتے صحت سودھا مختلف شعبیاں اچ تعاون دے ودھارے کیتے معاہدیاں اَتے مفاہمت دی یاداشتاں دا تبادلہ کیا گیا۔