افغانستان دہشت گرداں کیتے محفوظ پناہ گاہ بݨ چُکیے، اُتھوں سرحدی حملے اَتے انسانی بحران ودھدے پئن، پاکستان اقوام متحدہ کوں خبردار کرݙِتا

اقوام متحدہ۔ 11 دسمبر(اے پی پی) پاکستان اقوامِ متحدہ وچ خبردار کریندے آکھیے جو افغانستان دہشت گرداں کیتے محفوظ پناہ گاہ بݨ چُکیے، سرحدی حملے اَتے انسانی بحران ودھدے پئن۔ اقوام متحدہ وچ پاکستان دے مستقل مندوب عاصم افتخار احمد سلامتی کونسل کوں ݙسایا جو افغان سرزمین توں دہشت گردی پاکستان کیتے سَاریں توں وݙا خطرہ اے کیوں جو طالبان دہشت گرد گروپاں دی حمایت کریندن اَتے انہاں کوں بلا روک ٹوک سرحد پار کارروائی دی اجازت ݙیندن۔عاصم افتخار احمد آکھیا جو افغانستان ھک واری ول دہشت گرد گروپاں اَتے انہاں دے مددگاراں کیتے محفوظ پناہ گاہ بݨ چُکیے، جیں دے تباہ کن نتیجے ہمسایہ ملکاں بالخصوص پاکستان اَتے خطے وچ سامݨے آندے پئن۔ انہاں آکھیا جو داعش دے القاعدہ، تحریک طالبان پاکستان (ٹی ٹی پی)، ای ٹی آئی ایم، بی ایل اے اَتے مجید بریگیڈ جہیں گروہ افغان سرزمین تے محفوظ جہیں وچ موجود ہن اَتے سرحد پار حملے، خودکش دھماکے اَتے ٻئیاں کارروائیاں کریندے پئن۔ مندوب بھارت ول اشارہ کریندے آکھیا جو ھک مخالف فریق افغانستان توں پاکستان دے خلاف دہشت گردانہ سرگرمیاں کوں مالی، تکنیکی اَتے مادی مدد ݙے تے ودھارا ݙِتے۔انہاں آکھیا جو پاکستان گزریل چار سال دے دوران طالبان حکام نال باقاعدہ رابطے کیتے مگر دہشت گرد گروپاں دے خلاف ٹھوس اقدامات دی بجائے پاکستان تے حملیں وچ ودھارا تھیا۔ انہاں دا آکھݨ ہئی جو2025 وچ افغانستان توں پیدا تھیوݨ آلی دہشت گردی دے نتیجے وچ پاکستان اچ تقریباً 1200لوک جاں بحق تھئن۔