اسلام آباد۔ 11 دسمبر(اے پی پی) وفاقی وزیر آئی ٹی و ٹیلی کمیونیکیشن شزا فاطمہ خواجہ نال میٹا دے ھک اعلیٰ سطحی وفد ملاقات کیتی جیں وچ پاکستان اچ محفوظ اَتے ذمہ وار ݙیجیٹل ایکوسسٹم دی تشکیل کیتے پالیسی تعاون اَتے صارفین دے تحفظ متعلق اہم امور تے ڳالھ مہاڑ کیتی ڳئی۔ وفد وچ دانیہ مختار (ہیڈ آف پبلک پالیسی، میٹا پاکستان)، شی انگ تے (لیڈ کاؤنسل، میٹا پاکستان وسائوتھ/سینٹرل …
وفاقی وزیر شزا فاطمہ خواجہ نال میٹا دے وفد دی ملاقات
اسلام آباد۔ 11 دسمبر(اے پی پی) وفاقی وزیر آئی ٹی و ٹیلی کمیونیکیشن شزا فاطمہ خواجہ نال میٹا دے ھک اعلیٰ سطحی وفد ملاقات کیتی جیں وچ پاکستان اچ محفوظ اَتے ذمہ وار ݙیجیٹل ایکوسسٹم دی تشکیل کیتے پالیسی تعاون اَتے صارفین دے تحفظ متعلق اہم امور تے ڳالھ مہاڑ کیتی ڳئی۔ وفد وچ دانیہ مختار (ہیڈ آف پبلک پالیسی، میٹا پاکستان)، شی انگ تے (لیڈ کاؤنسل، میٹا پاکستان وسائوتھ/سینٹرل ایشیا)، نور بانو (ریگولیٹری کمپلائنس)، میلوڈی گوہ (ریگولیٹری اسکیلیشنز)، سحر طارق (کانٹینٹ پالیسی ڈویلپمنٹ) اَتے ربیکا او (واٹس ایپ پالیسی) شامل ہن۔ملاقات وچ آن لائن سیفٹی فریم ورکس کوں مضبوط بݨاوݨ تے خصوصی توجہ ݙتی ڳئی، خاص طور تے تریمتاں، ٻالاں اَتے کمزور طبقیں دے تحفظ کیتے ضروری اقدامات تے تفصیلی ڳالھ مہاڑ تھئی ۔ فریقین ایں ڳالھ تے اتفاق کیتا جو سوشل میڈیا پلیٹ فارمز تے آن لائن فراڈ اَتے ہراسگی دے ودھدے واقعات نال نبݨݨ کیتے رپورٹنگ میکانزم کوں بہتر بݨاوݨ، سکیورٹی پروٹوکولز کوں مزید مضبوط کرݨ اَتے ڈیجیٹل لٹریسی وچ ودھارے دی لوڑھ اے۔وفاقی وزیر شزا فاطمہ خواجہ محفوظ، جامع اَتے شہری مرکوز ڈیجیٹل پاکستان دے حکومتی وژن تے روشنی پاتی۔ انہاں آکھیا جو وزارت آئی ٹی عالمی ٹیکنالوجی کمپنیاں بالخصوص میٹا نال تعاون ودھیندی پئی اے تاں جو شہریاں کوں زیادہ محفوظ، بااعتماد اَتے جدید ݙیجیٹل سہولتاں ݙتیاں ونڄ سڳن۔ ملاقات دا اختتام مستقبل وچ رَل تے کم کرݨ اَتے تکنیکی تعاون دے ودھارے دے عزم تے تھیا، جیں دا مقصد ھک محفوظ اَتے اختراعی ڈیجیٹل ماحول دی تشکیل اے
