فیض حمید دے خلاف شواہد دی بنیاد تے فیصلہ آئے، اڄ حق اَتے سچ دی فتح تھئی اے، عطا اللہ تارڑ

اسلام آباد۔ 11 دسمبر(اے پی پی) وفاقی وزیر اطلاعات و نشریات عطا اللہ تارڑ سابق ڈی جی آئی ایس آئی فیض حمید دے خلاف فیصلے کوں حق اَتے سچ دی فتح قرار ݙیندے آکھیے جو قانون توں کوئی اُتے کائنی، فیض حمید سارے الزامات دے مرتکب پاتے ڳئے، فوج وچ خود احتسابی دا عمل ٻہوں مضبوط اے جیں دی واضح مثال ساریں ݙیکھ ڳھدی اے۔ میڈیا نال ڳالھ مہاڑ کریندے وفاقی وزیراطلاعات آکھیا جو اڄ انصاف اَتے قانون دی حکمرانی دا وݙا ݙینھ اے، فیض حمید کوں 15 مہینے تئیں جاری رہݨ آلا ٹرائل مکمل تھیوݨ دے بعد شواہد دی بنیاد تے سزا سُݨائی ڳئی۔ انہاں آکھیا جو فوج دے اندر مؤثر اَتے مربوط خود احتسابی دا نظام موجود اے جیں دے تحت اختیارات دے ناجائز استعمال، سیکریٹ ایکٹ دی خلاف ورزی اَتے سیاسی معاملیں وچ مداخلت جیھے امور تے سخت کارروائی کیتی ویندی اے۔ فیض حمید تے ریٹائرمنٹ دے بعد سیاسی سرگرمیاں وچ شرکت تے پابندی ہئی پر ایں دے باوجود او پی ٹی آئی دے پولیٹیکل ایڈوائزر رہیے اَتے9 مئی دے واقعات سودھے انتشار انگیز معاملیں وچ انہاں دی شمولیت دے ناقابل تردید شواہد سامݨے آئے۔انہاں آکھیا جو ٹاپ سٹی کیس وچ وی انہاں کوں پہلے ہی سزا سُݨائی ونڄ چکی اے جݙاں جو سیاسی معاملیں وچ مداخلت متعلق مزید تحقیقات جاری رہسن۔ انہاں آکھیا جو اڄ پاکستان کیتے وݙا ݙینھ اے جو ریڈ لائن کراس کرݨ، لوکاں نال ظلم و زیادتی کرݨ اَتے آپݨی اتھارٹی دا غلط استعمال کرݨ آلے شخص کوں سزا تھئی اے۔ وفاقی وزیر آکھیا جو فیض حمید کوں ٹرائل دے دوران پورا موقع ݙتا ڳیا جو او آپݨا دفاع کرن اَتے آپݨے حق اچ گواہ پیش کرن