پاکستان اَتے ایشیائی ترقیاتی بینک وچال257ملین ڈالر مالیت دے معاہدیں تے دستخط

اسلام آباد۔ 12 دسمبر (اے پی پی) پاکستان اَتے ایشیائی ترقیاتی بنک (اے ڈی بی) وچال257ملین ڈالر مالیت دے معاہدیں تے دستخط تھی ڳئے۔ وزارت اقتصادی امور ڈویژن ولوں جاری اعلامیہ موجب ، فریقین ریسپانسیو، ریڈی اینݙ ریزیلینٹ سائنس، ٹیکنالوجی، انجینئرنگ، میتھمیٹکس سیکنݙری ایجوکیشن پروگرام پنجاب، جیں دی مالیت107 ملین ڈالر اے (جیں وچ 7ملین ڈالر اے ڈی ایف گرانٹ شامل اے) اَتے پنجاب نرسنگ اَتے ہیلتھ ورکس فورس ریفارم پروگرام، جیں دی مالیت 150ملین ڈالر اے، دے معاہدیں تے دستخط کیتے۔وزارتِ اقتصادی امور دے سیکرٹری محمد حمیر کریم ایشیائی ترقیاتی بنک دے قابلِ اعتماد ترقیاتی سانجھے دار دے طور تے کردار اَتے پاکستان دے ترقیاتی اقدامات دی معاونت تے شکریہ ادا کیتا۔ انہاں انہاں اہم پروگرامز کیتے گھٹ شرائط تے اے ڈی بی دی مالی معاونت دی تعریف کیتی جیڑھی پنجاب اچ لمبے عرصے دی اَتے پائیدار سماجی ترقی، تعلیمی ضرورتاں اَتے صحت دیاں سہولتاں دی بہتری وچ اہم کردار ادا کریسی۔سیکرٹری، حکومتِ پنجاب دیاں کوششاں دی وی تعریف کیتی اَتے فنڈز دے ویلھے سر اَتے مؤثر استعمال تے زور ݙِتا۔ انہاں مزید ݙسایا جو سٹیم سیکنڈری ایجوکیشن پروگرام2026 توں2030تئیں پورے صوبے اچ تعلیمی ماحول وچ تبدیلی اَتے جامعیت کوں یقینی بݨاوݨ کیتے ٻہوں اہم اے۔ اِیویں ہی پنجاب نرسنگ پروگرام دا مقصد صوبے اچ مستند نرسز دی تعداد وچ ودھارا اَتے صحت دیاں خدمتاں ݙیوݨ بہتر بݨاوݨ اے۔ ایں پروگرام دے تحت لاہور، ملتان اَتے راولپنڈی اچ ترائے سینٹرز آف ایکسی لینس وی قائم کیتے ویسن۔ایشیائی ترقیاتی بینک دی کنٹری ڈائریکٹر ایما فین انہاں پروگرامز کیتے حکومتِ پاکستان دے مضبوط عزم دی تعریف کیتی۔ انہاں آکھیا جو تعلیم اَتے صحت دے اہم شعبیں وچ اے ݙوہیں پروگرام انسانی ترقی کیتے ٻہوں اہمیت رکھیندن۔ انہاں ایں ڳالھ تے زور ݙِتا جو ݙوہیں پروگرام نتیجے تے مبنی ہن اَتے انہاں نال انہاں شعبیں دے مجموعی نظام وچ بہتری آسی۔ حکومتِ پنجاب دے سکول ایجوکیشن ڈیپارٹمینٹ اَتے سپیشلائزڈ ہیلتھ کیئر اینڈ میݙیکل ایجوکیشن ڈیپارٹمینٹ دے سیکرٹریز وی انہاں پروگرامز دے فیدیں تے روشنی پاتی اَتے اے ڈی بی دا شکریہ ادا کیتا۔ انہاں ایں عزم دا اظہار کیتا جو حکومتِ پنجاب انہاں پروگرامز دی ویلھے سر اَتے کامیاب تکمیل کیتے ݙتے ڳئے مالی وسیلیں دا مؤثر استعمال یقینی بݨیسی۔