موسمیاتی اقدامات ہݨ اختیار دا نی، بقاء دا تقاضا بݨ چُکئن، وفاقی وزیر موسمیاتی تبدیلی وماحولیاتی ہم آہنگی دا اقوامِ متحدہ دی ماحولیاتی اسمبلی دے ستویں اجلاس توں خطاب

اسلام آباد۔ 12 دسمبر (اے پی پی) وفاقی وزیرموسمیاتی تبدیلی و ماحولیاتی ہم آہنگی ڈاکٹر مصدق ملک موسمیاتی عمل درآمد دی لازمی لوڑھ تے زور ݙیندے آکھیے جو موسمیاتی اقدامات ہݨ اختیار دا نی، بقاء دا تقاضا بݨ چُکن۔ اے ڳالھ انہاں کینیا دے دارالحکومت نیروبی وچ منعقد تھیوݨ آلی اقوامِ متحدہ دی ماحولیاتی اسمبلی (UNEA-7) دے ستویں اجلاس وچ خطاب کریندے آکھی۔ اے عالمی سطح دا اعلیٰ فورم ’’ھک مضبوط اَتے لچکدار کرۂ ارض کیتے پائیدار حل دی پیشرفت‘‘ دے موضوع دے تحت منعقد تھیا، جیں وچ اقوامِ متحدہ دے193 رُکن ملکاں دے نمائندیں دے نال سول سوسائٹی، سائنس داناں، ترقیاتی اداریں اَتے نجی شعبے دے نمائندیں وی شرکت کیتی۔اجلاس وچ عالمی ماحولیاتی پالیسیاں دی تشکیل، ترجیح دے تعین اَتے بین الاقوامی ماحولیاتی قوانین کوں مضبوط بݨاوݨ دے اقدامات تے جامع ڳالھ مہاڑ کیتی ڳئی۔ اجلاس وچ موسمیاتی لچک، موافقت، پائیدار ترقی اَتے سائنسی بنیاداں تے مبنی حل کیتے عالمی تعاون اَتے مالی معاونت دی لوڑھ تے زور ݙِتا ڳیا۔ڈاکٹر مصدق ملک آکھیا جو فطرت آپݨے اصولاں موجب چلدی اے، جے اساں ایں نال ناانصافی کروں تاں فطرت متاثر نی تھیندی پرایں ناانصافی دی پوری قیمت اساکوں چکاوݨی پوندی اے۔ انہاں پاکستان جیھے موسمیاتی خطرات توں ݙوچار ملکاں دی ودھدی کمزوریاں دی نشاندہی کریندے آکھیا جو لچک وچ ودھارا، موسمیاتی موافقت اَتے منصفانہ عالمی مالی معاونت ویلھے دی اہم لوڑھ اے۔ انہاں چتاوݨی ݙتی جے دنیا متحد تھی تے تکھے، مؤثر اقدامات نہ کیتے تاں ترقی پذیر ملکاں کوں مسلسل غیر متناسب انسانی، معاشی اَتے ماحولیاتی ضیان دا سامݨا کرݨا پوسی۔ ڈاکٹر مصدق ملک مؤثرعالمی حل لبھݨ، کثیر فریقی ماحولیاتی تعاون کوں تکڑا بݨاوݨ اَتے پائیدار مستقبل دے پاسے پیشرفت کیتے پاکستان دے عزم دا اعادہ کیتا۔