وزیراعظم شہباز شریف دی ترک صدر رجب طیب ایردوان نال ملاقات، توانائی، پٹرولیم اَتے معدنیات دے ترجیحی شعبیں وچ ترکیہ دی دلچسپی اَتے سرمایہ کاری دا خیرمقدم

اشک آباد۔ 12 دسمبر(اے پی پی) وزیراعظم محمد شہباز شریف ترکیہ دے نال سیاسی، توانائی، اقتصادی، دفاع اَتے سرمایہ کاری سودھے سانجھی دلچسپی دے سارے شعبیں وچ ݙو پاسے تعاون کوں مزید تکڑا بݨاوݨ دا عزم کریندے توانائی، پٹرولیم اَتے معدنیات دے ترجیحی شعبیں وچ ترکیہ دی دلچسپی اَتے سرمایہ کاری دا خیرمقدم کیتے۔ وزیراعظم دفتر دے میڈیا ونگ توں جاری بیان موجب، وزیراعظم محمد شہباز شریف دی ترک صدر رجب طیب ایردوان نال اشک آباد وچ بین الاقوامی فورم دے موقع تے ملاقات تھئی جیں وچ ݙوہیں رہنماواں ترکیہ اَتے پاکستان وچال تاریخی اَتے گھاٹے بھرپی آلے تعلقات دی اہمیت کوں دُہرایا، جنہاں دی بنیاد سانجھی اقدار اَتے امن و خوشحالی دی سانجھی خواہش تے ہے۔وزیراعظم جاری سال پاکستان اَتے ترکیہ وچال قیادت دی سطح تے تھیوݨ آلے مسلسل رابطیں تے اطمینان دا اظہار کریندے ترکیہ نال سیاسی، توانائی، اقتصادی، دفاع اَتے سرمایہ کاری سودھے سانجھی دلچسپی دے سارے شعبیں وچ ݙو طرفہ تعاون کوں مزید مستحکم بݨاوݨ دے عزم دا اظہار کیتا۔ وزیراعظم پاک ترک جے ایم سی دے16ویں اجلاس دے انعقاد تے اطمینان دا اظہار کیتا جیڑھا7 ویں ایچ ایل ایس سی سی دے فیصلیں تے عملدرآمد کوں یقینی بݨاوݨ دا کم کریسی۔وزیراعظم توانائی، پٹرولیم اَتے معدنیات دے ترجیحی شعبیں وچ ترکیہ دی دلچسپی اَتے سرمایہ کاری دا خیرمقدم کیتا۔ وزیراعظم اہم شعبیں وچ اڄوکے دستخط شدہ مفاہمتی یادداشت اَتے معاہدیں تے وقتی عملدرآمد کوں یقینی بݨاوݨ دی اہمیت تے زور ݙیندے آکھیا جو پاکستان بجلی دی تقسیم کار کمپنیاں دی نجکاری وچ ترکیہ دے ایں شعبے اچ تجربے توں فیدہ چاوݨ وچ دلچسپی رکھیندے۔ بیان موجب ، ایں سلسلے وچ فیصلہ کیتا ڳیا جو ݙوہیں ملکاں وچال وزارتی سطح دے تبادلے ٻہوں وقتی تھیسن ۔وزیر اعظم علاقائی رابطیں دی اہمیت تے زور ݙِتا جیں وچ اسلام آباد-تہران-استنبول ریل نیٹ ورک دی بحالی شامل اے۔ ݙوہیں رہنماواں علاقائی اَتے عالمی پیشرفت تے وی ڳالھ مہاڑ کیتی ۔ انہاں صدر رجب طیب ایردوان دی جُرأت مندانہ قیادت اَتے غزہ اچ امن دیاں کوششاں کیتے مضبوط عزم دی تعریف کیتی۔ انہاں پاکستان اَتے افغان طالبان حکومت وچال مذاکرات وچ سہولت ݙیوݨ وچ ترکیہ دے تعمیری کردار دا شکریہ وی ادا کیتا پر ایں ڳالھ تے زور ݙِتا جو امن اوں ویلھے ہی ممکن ہوسی جݙاں پاکستان دے سلامتی دے خدشے پورے طرح نال حل کیتے ویسن۔صدر رجب طیب ایردوان وزیراعظم محمد شہباز شریف دی طرفوں نیک خواہشات تے انہاں دا شکریہ ادا کیتا اَتے ݙوہیں ملکاں وچال مضبوط تعلقات بݨاوݨ کیتے رَل تے کم کرݨ دی خواہش دا اظہار کیتا۔