جنرل فیض حمید دی سزا آئین و قانون دی فتح، ملکی آندی سیاست تے دور رس نتائج پوسن، وفاقی وزیر پارلیمانی امور ڈاکٹر طارق فضل چوہدری دی پریس کانفرنس

اسلام آباد۔ 12 دسمبر(اے پی پی)وفاقی وزیر پارلیمانی امور ڈاکٹر طارق فضل چوہدری آکھیے جو جنرل فیض حمید دی سزا کہیں حکومت یا جماعت دی فتح کائنی اَتے نہ ہی کہیں خوشی دے شادیانے وڄائن، اے فیصلہ ملک دے آئین اَتے قانون دی فتح اے جیںدے ملک دی آندی سیاست تے دور رس نتائج پوسن۔ پریس کانفرنس اچ انہاں آکھیا جو اساݙی سیاسی تاریخ دا پہلا اینڄھا فیصلہ اے جیںدے اچ جنرل فیض حمید کوں 14 سال قید بامشقت ݙتی ڳئی اے، ایں فیصلے ملک دے حالیہ سیاسی بحران دے اصل محرکات واضح کر ݙتن، فوج اچ ایں توں پہلے اینڄھی مثال موجود کائنا ہائی جو فوج آپݨے ہی کہیں افسر کوں سزا ݙتی ہووے۔ انہاں آکھیا جݙاں کوئی آپݨے ریاستی منصب کوں سیاسی انجینئرنگ کیتے استعمال کریندے تاں ایںدے نتائج وی سامݨے آندن، کوئی وی آئین توں اُتے کائنی، بانی پی ٹی آئی جنرل فیض حمید دی پشت پناہی پاروں ریاست اَتے ریاستی اداریاں دے خلاف منفی پروپیگنڈا کیتا۔ فوج اچ تقسیم پیدا کرݨ دی کوشش کیتی ڳئی، انہاں دے سارے غیر آئینی اقدامات نال ملک اچ سیاسی عدم استحکام آیا، ایں سزا دے بعد ملک دے سیاسی نظام اچ کہیں کوں اینڄھی کہانی دُہرَاوݨ دی جُرأت نہ ہوسی۔ انہاں آکھیا جو ایں فیصلے فوج دے اندرونی احتساب دے نظام تے عوام دا اعتماد بحال کیتا۔ انہاں آکھیا جو ݙوجھے پاسو ھک ڄݨا جیل اچ بَہہ تے اساݙیاں فوج، ریاستی اداریاں اَتے انہاں دے سربراہان دے خلاف جیڑھا پروپیگنڈا کریندا پئے او دنیا دا کوئی مہذب ملک قبول نا کریسی۔ ھک سوال دے ولدے اچ انہاں آکھیا جو فیض حمید دے غیر آئینی اقدامات توں فیدے حاصل کرݨ آلے لوکاں دے ناں سامݨے آوݨ حالی اڄے باقی ہین، انہاں دے خلاف وی کارروائی کیتی ویسی۔