ملک معاشی بحران توں نکل چکیے ،ادارہ جاتی اصلاحات نال گڈگورننس اچ ودھارا تھیسی ،نینگراں کوں فنی ٹریننگ ݙے تے برسر روزگارکریسوں،وزیراعظم  شہبازشریف دا نیشنل ریگولیٹری ریفارمز دی افتتاحی تقریب توں خطاب

لاہور۔ 13 دسمبر (اے پی پی) وزیراعظم محمد شہباز شریف آکھیے جو ملک معاشی بحران توں نِکل چُکیے، ترقی آلے پاسے ویندے پیوں ، ادارہ جاتی اصلاحات نال گُڈ گورننس وچ ودھارا تھیسی، نوجوان قیمتی اثاثہ ہن، انہاں کوں فنی ٹریننگ ݙے تے روزگار ݙیسوں۔ اے ڳالھ انہاں نیشنل ریگولیٹری ریفارمز دی افتتاحی تقریب توں خطاب کریندے آکھی۔وزیراعظم محمد شہباز شریف آکھیا جو کاروباری طبقے اَتے عوام ولوں انہاں اصلاحات دا مطالبہ کئی ݙہاکیں توں ہئی، سرمایہ کار، صنعت کار، تاجر برادری پیچیدہ قوانین، غیر ضروری ضوابط اَتے لمبے طریقہ کار توں پریشان ہن۔ ریگولیٹری فریم ورک دا اجرا کُوآنٹم جَمپ دی حیثیت رکھیندے، انہاں اصلاحات نال کاروباری برادری اَتے عوام دے پراݨے مسئلے حل تھیسن۔محمد شہباز شریف آکھیا جو جݙاں اساں حکومت سنبھالی تاں ملکی معیشت زبوں حالی دا شکار ہئی، پالیسی ریٹ معیشت کوں مفلوج کر چُکیا ہئی، مہانگ مہاڑی بے قابو ہئی اَتے کاروباری سرگرمیاں رُک ڳئیاں ہن، ملک دیوالیہ تھیوݨ دے نیڑے کھڑا ہا۔ انہاں آکھیا جو اساݙی حکومت بہتر حکمت عملی نال چیلنجز دا مقابلہ کیتا اَتے رَل تے کم کر تے ملک کوں ایں دلدل توں کڈھیا۔انہاں آکھیا جو اڄ الحمدللہ پاکستان معاشی بحران توں نِکل چُکیے، معاشی اشاریے ٻہوں بہتر تھی ڳئن، غیر ملکی سرمایہ کاراں دا اعتماد بحال تھیا اَتے سرمایہ کاری وچ ودھارا تھیندا پئے، آئی ایم ایف1.2بلین ڈالر دی قسط دی منظوری ݙے ݙتی اے جیں نال آندے ݙینھاں اچ معاشی حالات مزید بہتر ہوسن۔وزیراعظم آکھیا جو نوجوان اساݙا قیمتی اثاثہ ہن، انہاں کوں روزگار ݙیوݨ کیتے فنی و پیشہ ورانہ تربیت ݙیوݨ کیتے سارے وسیلے استعمال کیتے ویندے پئن اَتے آسان کاروبار سکیم توں ہزاراں نوجوان فیدہ چیندے پئن۔ انہاں آکھیا جو ایں تربیت نال نوجواناں کوں ملک اَتے ٻاہرلے ملک وی روزگار دے موقع مِلسن، جیں نال بیروزگاری دا خاتمہ تھیسی اَتے زرمبادلہ دے ذخیرے وچ وی ودھارا تھیسی۔ وزیراعظم آکھیا جو اساکوں عوام دے مسلیں دا احساس اے، جیں کیتے ݙینھ رات کوشش کریندے پیوں ، ملک کوں ترقی دے رستے ٹور ݙتے ، مزید ٹارگٹس حاصل کرݨ کیتے تکھے اڳوں ودھدے پیوں ۔ معیشت دی پائیدار ترقی کیتے غیر ملکی سرمایہ کاری کوں راغب کرݨ ضروری اے۔ سعودی عرب، متحدہ عرب امارات، برطانیہ، امریکہ سودھے ٻئے ملکاں نال مختلف شعبیں وچ بہتری کیتے پورا تعاون گھندے پیوں ، اَتے وقتی ملک کوں معاشی قوت بݨیسوں۔تقریب توں خطاب کریندے وزیراعظم دے معاون خصوصی ہارون اختر آکھیا جو حکومت مختلف شعبیں وچ اصلاحات متعارف کرویندی پئی اے ، اے صرف ھک پالیسی کائنی بلکہ ھک نویں باب دا آغاز اے۔ انہاں آکھیا جو ترقیاتی ریاست ہمیشہ جُرأت مند، سہولت ݙیوݨ آلی اَتے مستقبل تے نظر رکھݨ آلی ہوندی اے، ترقیاتی ریاست شہریاں کوں لال فیتے دی بجائے جدت، مقابلہ، تعمیر اَتے ترقی دے موقع ݙیندی اے۔ انہاں آکھیا جو وزیراعظم محمد شہباز شریف واضح ویژن، انتھک محنت اَتے صلاحیت کوں کارکردگی وچ بدلݨ دا پکا عزم رکھیندن، انہاں دی دانش مندانہ قیادت وچ ملکی ترقی دے ایں سفر کوں جاری رکھیسوں۔برطانوی وزیرِ مملکت بین الاقوامی ترقی دی رائیٹ آنر ایبل بیرونس چیپمین آکھیا جو ریگولیٹری اصلاحات دے اجرا دی ایں تقریب وچ شرکت اعزاز دی ڳالھ اے، جیڑھی ݙوہیں ملکاں وچال برادرانہ تعلقات کوں ݙکھیندی اے۔ انہاں آکھیا جو پاکستان بے پناہ صلاحیتاں نال بھرپور اَتے سرمایہ کاری کیتے بہترین ملک اے، قدرتی وسیلیں نال بھریا ہویا اَتے عالمی تجارتی رستیں دے مرکز تے ہووݨ پاروں پاکستان توجہ دا مرکز اے، ݙوہیں ملک آپت وچ تجارتی رابطے ودھاوݨ کیتے پُرعزم ہن۔ایندے توں پہلے وزیراعظم محمد شہبازشریف نیشنل ریگولیٹری اصلاحات دا افتتاح کیتا۔