پائیداری اَتے مالیاتی استحکام کوں ھک ݙوجھے دا معاون بݨایا ونڄݨا ضروری اے، مصدق ملک

نیروبی، کینیا۔ 13 دسمبر (اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک منصفانہ مالیاتی بہاؤ، مضبوط بین الاقوامی تعاون اَتے ذمہ وار نجی شعبے دی شمولیت دی اہمیت تے زور ݙیندے آکھیے جو پائیداری اَتے مالیاتی استحکام کوں ھک ݙوجھے دا معاون بݨایا ونڄݨا ضروری اے۔ او اقوامِ متحدہ دی ماحولیاتی اسمبلی دے موقع تے ماحولیات اَتے عالمی مالیاتی استحکام متعلق اعلیٰ سطحی قیادت مکالمے وچ ڳالھ مہاڑ کریندے پئے ہن۔وفاقی وزیر ڈاکٹر مصدق ملک اقوامِ متحدہ دی ماحولیاتی اسمبلی دے موقع تے منعقدہ اعلیٰ سطحی قیادت مکالمے وچ شرکت کیتی جیں دا عنوان ہا “ماحولیاتی زوال نال نبݨݨ عالمی مالیاتی نظام دے مستقبل کیتے کیوں ضروری اے؟” ایں مکالمے وچ عالمی رہنماواں، پالیسی سازاں، مالیاتی ریگولیٹرز اَتے ماہرین شرکت کیتی جݙاں جو انہاں ہمہ گیر نظاماتی طریقۂ کار تے غور کیتا ڳیا جیں نال نجی مالیاتی وسائل کوں ایجھے رستیں ول موڑیا ویندا پئے جو معاشی اَتے مالیاتی نظام دے استحکام کوں ودھارا ݙیوݨ دے نال نال موسمیاتی تبدیلی، حیاتیاتی تنوع دے ضیان، آلودگی اَتے فضلے جہیں مسلیں نال نبݨݨ وچ مدد ݙیون۔مباحثے دے دوران پالیسی ہم آہنگی، مؤثر ضابطہ جاتی فریم ورکس اَتے حکومت دے سارے شعبیں تے مشتمل نقطۂ نظر دی اہمیت کوں اُجاگر کیتا ڳیا تاں جو پائیدار مالیات دے ودھارے کیتے چنڳاں ماحول بݨایا ونڄ سڳے۔ اپنی ڳالھ مہاڑ وچ ڈاکٹر مصدق ملک ایں ڳالھ تے زور ݙِتا جو ماحولیاتی زوال عالمی مالیاتی نظام کیتے سنگین نظاماتی خطرے پیدا کریندا پئے اَتے موسمیاتی تبدیلی نال نبݨݨ ھک سانجھی عالمی ذمہ واری اے۔ انہاں آکھیا جو او ملک جو موسمیاتی تبدیلی توں ساریں توں ودھ متاثر تھیندے پئن،پر عالمی اخراج وچ انہاں دا حصہ گھٹ اے، انہاں کوں لچک پیدا کرݨ اَتے ترقیاتی کامیابیاں دے تحفظ کیتے منصفانہ، مؤثر اَتے پُڄ وچ آوݨ آلی موسمیاتی مالی معاونت دی سخت لوڑھ اے۔وفاقی وزیر منصفانہ مالیاتی بہاؤ، مضبوط بین الاقوامی تعاون اَتے ذمہ وار نجی شعبے دی شمولیت دی اہمیت تے زور ݙِتا۔ انہاں موسمیاتی لچک تے مبنی ترقی دے ودھارے اَتے ماحول دوست مالی نظام دی تشکیل کیتے عالمی کوششاں وچ پاکستان دے پُورے تعاون دے عزم دا اعادہ کیتا۔