نو مئی دے واقعات صرف اتفاق کائنی بلکہ ھک منظم اَتے سوچی سمجھی سازش ہن جیں دے ذریعے پاکستان دی سلامتی اَتے ریاستی اداریں کوں نشانہ بݨایا ڳیا، وفاقی وزیر ریلوے حنیف عباسی

راولپنڈی۔ 13 دسمبر (اے پی پی) وفاقی وزیر ریلوے حنیف عباسی آکھیے جو9 مئی دے واقعات صرف اتفاق کائنی بلکہ ھک منظم اَتے سوچی سمجھی سازش ہن جیں دے ذریعے پاکستان دی سلامتی اَتے ریاستی اداریں کوں نشانہ بݨایا ڳیا۔ اے ڳالھ انہاں راولپنڈی چیمبر آف کامرس اینڈ انڈسٹری دے زیر اہتمام ایوب نیشنل پارک وچ منعقدہ ترائے ݙینھ دے فوڈ فیسٹیول دے افتتاح دے موقع تے خطاب کریندے آکھی۔حنیف عباسی آکھیا جو بانی پی ٹی آئی دا بیانیہ ملکی مفاد، قومی سلامتی اَتے ریاستی اداریں دے خلاف اے۔ انہاں آکھیا جو اقتدار دی ہوس وچ ملک دی سالمیت کوں داؤ تے لاتا ڳیا اَتے9 مئی کوں شہداء دیاں یادگاراں دی بھن تروڑ، کور کمانڈر ہاؤس اَتے جی ایچ کیو تے حملے کیتے ڳئے۔ انہاں آکھیا جو اے اوہا سازش ہائی جیں دی دشمن ہمیشہ خواہش رکھیندا ہئی اَتے جیڑھی اندرلی و ٻاہرلی ملی بھگت نال عملی شکل اختیار کر ڳئی، جیں دے ثبوت، فون کالز اَتے منصوبہ بندی سَبھ ریکارڈ تے موجود ہن۔وفاقی وزیر ریلوے آکھیا جو چیف آف ڈی فینس فورسز فیلڈ مارشل سید عاصم منیر دی قیادت وچ پاکستان دی مسلح افواج ݙاہ گُنا وݙے دشمن کوں تاریخی شکست ݙتی جیں کوں ساری دنیا منیندی اے۔ انہاں آکھیا جو شہداء دیاں قربانیاں پاروں اڄ دنیا بھر وچ پاکستان زندہ باد دے نعرے لڳدے پئن اَتے قوم کوں آپݨیاں افواج تے ماݨ اے۔