سانحہ9 مئی دا ماسٹر مائنڈ فیض حمید ہئی، احتساب دا عمل منطقی انجام تئیں پُؔڄسی، خواجہ محمد آصف

سیالکوٹ۔ 13 دسمبر (اے پی پی) وفاقی وزیر دفاع خواجہ محمد آصف آکھیے جو قومی منظرنامے تے اڄوکے ݙینھ اچ پیش آوݨ آلے واقعات دی شاید پاکستان دی تاریخ وچ مثال نی مِلدی۔ ملکی تاریخ وچ پہلی واری ھک ادارے احتساب دا عمل آپݨے اندروں شروع کیتا اَتے ھک سینئر افسر اَتے آئی ایس آئی دے سابق سربراہ دے خلاف تقریباً پندرہ مہینے طویل عدالتی کارروائی دے بعد سزا سُݨائی ڳئی، جیڑھا ھک غیر معمولی اَتے تاریخی قدم اے۔انہاں آکھیا جو ایں منصوبے دا عملی آغاز فیض حمید کیتا ہا اَتے2018 دے انتخابات وچ جیڑھا کُجھ تھیا او سَبھ دے سامݨے اے اَتے فیض حمید دی نگرانی وچ بانی پی ٹی آئی کوں اقتدار وچ گھن آیا ڳیا۔ انہاں آکھیا جو گزریل چار سال وچ ملک نال جیڑھا سیاسی اَتے ریاستی کھِلواڑ کیتا ڳئے، اوں وچ بانی پی ٹی آئی اَتے فیض ھک ݙوجھے دے سانجھے دار رہیے اَتے پاکستان کوں تباہی دے نیڑے پُڄایا۔خواجہ محمد آصف آکھیا جو جݙاں اے سارے رستے ناکام تھئے تاں9 مئی دا سانحہ تھیا، جیں دا ماسٹر مائنڈ فیض حمید ہئی اَتے ایں دی پوری منصوبہ بندی پہلے توں کیتی ڳئی ہئی۔ انہاں آکھیا جو اے افواجِ پاکستان اَتے ریاستِ کوں ضیان پڄاوݨ دا ھک منظم منصوبہ ہئی، جیں دے تحت خاص طور تے پنجاب اَتے خیبر پختونخوا وچ تباہی کھنڈائی ڳئی۔وفاقی وزیر دفاع آکھیا جو پاکستان دی78 سالہ تاریخ وچ جیڑھی کامیابی اَتے استحکام فیلڈ مارشل عاصم منیر دی قیادت وچ آپریشن بنیان مرصوص دی صورت وچ ملیا، ایں دی کوئی مثال نی مِلدی۔ انہاں آکھیا جو او قوم کوں یقین ݙویندن جو اے سلسلہ اتھاں ختم نہ تھیسی اَتے پاکستان دے دشمناں دا احتساب منطقی انجام تئیں پُڄایا ویسی۔