حضرت محمد صلی اللہ علیہ وسلم نال عقیدت اساݙے ایمان دا حصہ اے، سید یوسف رضا گیلانی

ملتان۔ 13 دسمبر (اے پی پی) چیئرمین سینیٹ سید یوسف رضا گیلانی آکھیے جو خواہش اے جو ساری دنیا وچ حضور پاک صلی اللہ علیہ وآلہ وسلم دی ولادت با سعادت دا جشن منایا ونڄے۔ اے ڳالھ انہاں موضع ٹھٹھہ سیالاں مظفرگڑھ وچ سالانہ میلاد النبی کانفرنس دے موقع تے آکھی ۔سید یوسف رضا گیلانی آکھیا جو حضرت محمد صلی اللہ علیہ وسلم نال عقیدت اساݙے ایمان دا حصہ اے، او آخری نبی ہن اَتے انہاں دے بعد کوئی نبی نہ آسی۔ انہاں آکھیا جو شہید ذوالفقار علی بھٹو قادیانیاں کوں غیر مسلم قرار ݙے تے امت مسلمہ دے دِل جِتیے۔انھاں دے ایں عمل کوں ہمیشہ یاد رکھیا ویسی ۔ انہاں مزید آکھیے جو اساں کئی سول سالاں توں نبی پاک دے میلاد دا جشن منیندے پیوں اتے اے جشن اڳوں وی جاری رہسی ۔کانفرنس دے چھیکڑ اچ چئیر مین سینیٹ سید یوسف رضا گیلانی امت مسلمہ دی خوشحالی اتے ملکی ترقی سانڳے اجتماعی دعا کرائی۔ بعد اچ سید یوسف رضا گیلانی غلاف خانہ کعبہ،نعلین مبارک ،قندیل خانہ کعبہ و روضہ رسول تے ٻئی پاک نوادرات دی زیارت کیتی۔ سالانہ میلاد کانفرنس اچ سجادہ نشین دربار گولڑہ شریف پیر قطب الحق گیلانی،ممبر قومی اسمبلی نواب افتخاراحمد خان،سابق ایم این اے رضا ربانی کھر،سیاسی و سماجی شخصیات،علمائے کرام،نعت خوان حضرات اتے معززین علاقہ وݙی تعداد اچ شرکت کیتی۔