علی گڑھ انسٹیٹیوٹ دے زیراہتمام پنجویں گریجویشن دی تقریب، وفاقی وزیر ڈاکٹر خالد مقبول صدیقی دی خصوصی شرکت

کراچی۔ 13 دسمبر (اے پی پی) علی گڑھ انسٹیٹیوٹ آف ٹیکنالوجی (اے آئی ٹی) دے زیراہتمام پنجویں گریجویشن دی تقریب تھئی جیں وچ مختلف شعبیں دے555توں ودھ طالب علماں کوں ایسوسی ایٹ انجینئر دے ڈپلومے نال نوازیا ڳیا۔ آپݨے شعبیں وچ چنڳی کارکردگی ݙکھاوݨ آلے طالب علماں کوں بالترتیب پہلی، ݙوجھی اَتے تریجھی پوزیشن تے سونے، چاندی اَتے کانسی دے تمغے ݙتے ڳئے۔وفاقی وزیر تعلیم ڈاکٹر خالد مقبول صدیقی خطاب کریندے آکھیا جو اے ادارہ صدی پراݨے ھک ارادے نال جُڑیا ہویا اے اَتے ایں دی بنیاد سرسید احمد خان دے وژن دے موجب رکھی ڳئی ہئی۔ انہاں آکھیا جو تکنیکی تعلیم اڄوکی دنیا دی ساریں توں اہم لوڑھ اے۔ پاکستان وچ 35سال توں گھٹ عمر دی آبادی تقریباً 16 کروڑ توں ودھ اے جیڑھی کئی ملکاں دی کُل آبادی توں وی ودھ اے۔ انہاں آکھیا جو ایں تکھی رفتار دی دنیا سَارا کُجھ بدل ݙتے، اے علمی معیشت اَتے مصنوعی ذہانت دا دور اے۔اے آئی ٹی گورننگ باڈی دے چیئرمین محمد اکبر علی خان1989 وچ اے آئی ٹی دے قیام دے بعد توں ہݨ تئیں تھیوݨ آلی شاندار ترقی تے اطمینان دا اظہار کیتا۔ انہاں ݙسایا جو چین دے TANG انٹرنیشنل ادارے نال معاہدے دے تحت انسٹیٹیوٹ دے طالب علم تعلیم حاصل کرݨ کیتے چین ڳئے ہوئے ہن۔