صحت مند معاشرے کیتے تعلیم دے نال کھیݙاں دیاں سرگرمیاں ٻہوں ضروری ہن، رانا مشہود احمد خان

لاہور۔ 14 دسمبر (اے پی پی) چیئرمین وزیراعظم یوتھ پروگرام رانا مشہود احمد خان آکھیے جو وزیراعظم محمد شہباز شریف دی دانش مندانہ قیادت وچ سفارتی کامیابیاں دا سفر جاری اے، ملکی سلامتی و قومی اداریں دے خلاف زہریلا پراپیگنڈا کرݨ آلیں کوں احتساب دی کچاری وچ گھن آیا ویسی۔ صحت مند معاشرے کیتے تعلیم دے نال کھیݙاں دیاں سرگرمیاں ٻہوں ضروری ہن۔اے ڳالھ انہاں 13 ویں انٹر سکول جمناسٹک چیمپئن شپ دی تقریب توں خطاب کریندے آکھی۔ انہاں آکھیا جو ٻالاں کوں صحت مند سرگرمیاں دے ول گھن آوݨ معاشرے اَتے حکومت دی ذمہ واری اے، جیں کیتے سارے وسائل استعمال کیتے ویندے پئن۔انہاں آکھیا جوآندے سال ملک دی پہلی یوتھ گیمز تھیوݨ ویندیاں پئن، خواہش اے جو2028 گیمز وچ پاکستان ولوں درجناں ارشد ندیم جیھے کھݙاری سامݨے گھن آئے ونڄن۔رانا مشہود احمد خان آکھیا جو اساں ایں ملک کوں نہ صرف دیوالیہ تھیوݨ توں بچایا بلکہ ایں ملک کوں معاشی قوت بݨاوݨ کیتے ݙینھ رات کوشاں ہن، ہݨ کہیں کوں ایں ترقی دے سفر کوں روکݨ دی ہرگز اجازت نی ݙتی ونڄ سڳدی۔انہاں آکھیا جو پاک فوج قومی سلامتی کیتے ݙینھ رات قربانیاں ݙیندی پئی اے، قوم متحد اَتے متفق اے جو اداریں دے خلاف زہریلا پراپیگنڈا کرݨ آلے اکاؤنٹاں دا احتساب تھیوے۔ جنرل فیض حمید کوں سزا ھک نویں باب دا آغاز اے، اے اختیارات توں تجاوز دا فیصلہ ہئی، جنرل فیض دے کیس وچ قوم سرخرو تھئی اے، اَتے ہݨے بغاوت اَتے فارن فنڈنگ سودھے ٻئے فیصلے آوݨ باقی ہن۔