ملک اچ انسدادِ پولیو مہم دا آغاز

اسلام آباد۔ 15 دسمبر(اے پی پی) ملک اچ انسدادِ پولیو پروگرام پنج سال توں گھٹ عمر دے4 کروڑ50لکھ توں ودھ ٻالاں کوں عمر بھر دی معذوری توں تحفظ ݙیوݨ کیتے ملک گیر انسدادِ پولیو مہم دا آغاز کر ݙتا ڳئے۔اے پاکستان دی سال2025وچ پنجویں قومی انسدادِ پولیو مہم ہوسی۔ نیشنل ایمرجنسی آپریشن سینٹر ولوں جاری تفصیل موجب15 دسمبر کوں شروع تھیوݨ آلی اے پولیو مہم افغانستان دے نال ہم آہنگ کیتی ویندی پئی اے، تاں جو ݙوہیں ملک رل تے حفاظتی قوت کوں مضبوط کرسڳن اَتے سرحدی علاقیں وچ وائرس دی منتقلی کوں روک سڳن۔ ہݨ تئیں30پولیو کیسز رپورٹ تھئن، جݙاں جو گزریل سال ایں دی تعداد74ہئی، جیڑھی پاکستان دی نمایاں پیشرفت کوں ݙکھیندی اے۔ایں مہم دے دوران چارلکھ توں ودھ فرنٹ لائن ہیلتھ ورکرز آپݨیاں ذمہ واریاں نبھیندے بلوچستان، سندھ، خیبرپختونخوا، پنجاب، گلگت بلتستان، آزاد جموں و کشمیر اَتے اسلام آباد وچ گھر گھر ونڄ تے ٻالاں کوں پولیو توں بچاوݨ دے قطرے پلیسن، تاں جو کوئی وی ٻال ویکسین توں محروم نہ رہوے