حکومت ݙڈھ سال وچ معیشت کوں استحکام دے رستے تے ٹورݙتا، وزیرِ مملکت خزانہ بلال اظہر کیانی دی پریس کانفرنس

اسلام آباد۔ 15 دسمبر (اے پی پی) وزیرِ مملکت خزانہ بلال اظہر کیانی آکھیے جو موجودہ حکومت صرف ݙڈھ سال دے عرصے وچ معیشت کوں استحکام دی بنیاد ݙے ݙتی اے، جݙاں جو اقتدار سنبھالݨ ویلھے حالات ٻہوں اوکھے ہن اَتے خُود اے آکھیا ویندا پیا ہئی جو اقتدار کنڈیں دا تاج اے۔اسلام آباد وچ پریس کانفرنس توں خطاب کریندے انہاں ݙسایا جو حکومت آئی ایم ایف پروگرام دے تحت پرائمری سرپلس دا ہدف بغیر کہیں منی بجٹ دے حاصل کیتا اَتے سارے آئی ایم ایف جائزے کامیابی نال پورے کیتے ڳئن۔انہاں آکھیا جو معاشی استحکام دے نتیجے وچ مہانگ22 فیصد توں گھٹ تھی تے سنگل ڈِجٹ وچ آ چُکی اے، جݙاں جو زرمبادلہ دے ذخائر وچ نمایاں بہتری آئی اے۔ ایویں ٹیکس ٹو جی ڈی پی شرح8.8توں ودھ تے 10.3تئیں پُڄ ڳئ یاے اَتے ایف بی آر دے ٹیکس ریونیو وچ 26 فیصد دا ودھارا ریکارڈ کیتا ڳیا۔بلال اظہر کیانی آکھیا جو عالمی ریٹنگ ایجنسیاں ولوں پاکستان دی کریڈٹ ریٹنگ وچ بہتری وی حکومت دی معاشی پالیسیاں تے اعتماد دا ثبوت اے۔ انہاں دا آکھݨا ہئی جو ہݨ حکومت دا اڳلا ہدف نجی شعبے دی قیادت وچ پائیدار اقتصادی ترقی حاصل کرݨا اے۔انہاں اپوزیشن جماعت پی ٹی آئی تے تنقید کریندے آکھیا جو پی ٹی آئی پاکستان کوں ڈیفالٹ دی ول دھکیلݨ وچ کوئی کسر نی چھوڑی، انہاں آئی ایم ایف کوں خط لکھوائے اَتے سفارتی تعلقات کوں ضیان پڄایا ۔ انہاں آکھیا جو معیشت، سفارت کاری اَتے دفاع دے خلاف منفی بیانیے دا آغاز اڈیالہ جیل وچ بیٹھے نام نہاد لیڈر توں تھیندے۔وزیرِ مملکت آکھیا جو لیفٹیننٹ جنرل (ر) فیض حمید کوں سزا ݙے تے پاک فوج خُود احتسابی دی روشن مثال قائم کیتی۔ انہاں زور ݙِتا جو حکومت معاشی بہتری اَتے پائیداری دے تسلسل کوں یقینی بݨیسی اَتے پی ٹی آئی کوں تباہ کُن سوچ دی بجائے تعمیری سیاست اپناوݨی چاہیدی اے