پاکستان تے اسلامی ترقیاتی بینک وچال 603 ملین ڈالر دے 3 معاہدیاں تے دستخط

اسلام آباد۔ 20 جنوری (اے پی پی) پاکستان تے اسلامی ترقیاتی بینک وچال تقریباً 603 ملین امریکی ڈالر دے ترائے  معاہدیاں تے دستخط تھی ڳئن۔ اے معاہدے ایم-6 سکھر حیدرآباد موٹروے منصوبہ، ٻہوں زیادہ غریب تے سیلاب نال متاثرہ خانداناں کوں غربت توں کڈھݨ دے منصوبے تے آزاد جموں و کشمیر اچ سکولاں توں ٻاہر ٻالاں کیتے مالی امداد دے حوالے نال کیتے ڳئن۔ وزارتِ اقتصادی امور ولوں جاری اعلامیے دے مطابق اے معاہدے وفاقی وزیر احد چیمہ تے بینک دے نائب صدر ڈاکٹر رامی احمد وچال مذاکرات دے بعد طے تھیے۔ معاہدیاں دے تحت سکھر حیدرآباد موٹروے کیتے 475 ملین ڈالر ݙتے ویسن ۔ ایندے علاوہ غربت مکاؤ منصوبے دی مجموعی لاگت 134.2 ملین ڈالر اے  جیندے اچوں 118.4 ملین ڈالر بینک فراہم کریسی ۔ اے منصوبہ 25 ضلعیاں اچ نافذ کیتا ویسے  جیندے نال ہک لکھ روزگار دے مواقع پیدا تھیسن۔ آزاد جموں و کشمیر اچ سکولاں توں ٻاہر ٻالاں کیتے 10 ملین ڈالر فراہم کیتے ویسن تانجو 60 ہزار ٻالاں کوں ولا  سکولاں اچ آندا ونڄ سڳے۔ وفاقی وزیر بینک دے تعاون کوں سراہیندے ہوئیں انھاں دا شکریہ ادا کیتا۔