پی آئی اے دی عظمتِ رفتہ بحال تھیسی، پاکستان دا ناں وی اچا تھیسی، وزیراعظم دا حکومت اتے عارف حبیب کنسورشیم وچال ٹرانزیکشن دی دستاویزات تے دستخط و تبادلے دی تقریب نال خطاب

اسلام آباد۔ 29 جنوری(اے پی پی)وزیراعظم محمد شہباز شریف پی آئی اے دی شفاف نجکاری مکمل تھیوݨ تے اطمینان کریندے امید کیتی اے جو نجکاری دے بعد پی آئی اے دی عظمتِ رفتہ بحال تھیسی، لوکاں کوں چنڳیاں سفری سہولتاں ملسن اتے پاکستان دا ناں وی اُچا تھیسی۔ انہاں اے ڳالھ اسلام اباد اچ پاکستان انٹرنیشنل ایئر لائنز دی نجکاری دے حوالے نال حکومت تے عارف حبیب کنسورشیم وچال ٹرانزیکشن دی دستاویزات تے دستخط اتے تبادلے دی تقریب نال خطاب اچ آکھی۔ ایں موقع تے نائب وزیراعظم محمد اسحاق ڈار، وزیر دفاع خواجہ محمد آصف، وفاقی وزیرِ اطلاعات عطاء اللہ تارڑ، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر اتے ٻئے اعلیٰ حکام وی موجود ہن۔ وزیراعظم دستخطی تقریب کوں اہم قرار ݙتے اتے آکھیے جو نجکاری دے بعد پی آئی اے مسافروں دے آرام دہ سفر، تحفظ اتے وقار کوں یقینی بݨیسی، پی آئی اے دا ہوا بازی دے شعبے اچ ہک اچا مقام ہئی اتے ڄڳ اچ “گریٹ پیپل ٹو فلائی ود” دا سلوگن پی آئی اے دی سنڄاݨ ہئی، سہولتاں بہتر تھیوݨ نال ادارے دا معیار وی چنڳاں تھیسی۔ انھاں نجکاری دے عمل اچ نائب وزیراعظم، فیلڈ مارشل اتے حکومتی ٹیم دے کردار کوں بے مثال قرار ݙتا جو ایندے نال پی آئی اے اتے سرمایہ کاری اچوں 55 ارب روپے قومی خزانے اچ آسن۔  تقریب نال چیئرمین کنسورشیم عارف حبیب وی خطاب کیتے اتے آکھیے جو 180 ارب روپے دی سرمایہ کاری اچوں 125 ارب روپے پی آئی اے دی بہتری تے خرچ تھیسن، پوری کوشش ہوسی جو پی آئی اے دی عظمتِ رفتہ بحال کروں۔ وزیراعظم دے مشیر برائے نجکاری محمد علی آکھیے جو کنسورشیم 180 ارب روپے دی سرمایہ کاری کریسی جیندے اچوں 55 ارب روپے سرکاری خزانے اچ جمع تھیسن۔ ایں توں پہلے تقریب اچ حکومتی اتے کنسورشیم دے نمائندیاں دستاویزات تے دستخط کیتن۔