مسلح افواج قوم دی حمایت نال دہشتگردی مکاوݨ اتے پائیدار امن سانڳے پرعزم ہین، فیلڈ مارشل سید عاصم منیر

راولپنڈی۔22 ستمبر(اے پی پی)آرمی چیف اتے چیف آف ڈیفنس فورسز فیلڈ مارشل سید عاصم منیر آکھیے جو مسلح افواج پوری قوم دی غیر متزلزل حمایت نال دہشتگردی دے مکمل خاتمے اتے ملک اچ پائیدار امن کیتے پرعزم ہن۔ آئی ایس پی آر دے مطابق آرمی چیف تے چیف آف ڈیفنس فورسز فیلڈ مارشل سید عاصم منیر کور ہیڈ کوارٹر پشاور دا دورہ کیتے۔ انہاں کوں خیبر پختونخوا اچ سکیورٹی دی موجودہ صورتحال، جاری انسدادِ دہشتگردی آپریشنز، بارڈر مینجمنٹ دے اقدامات اتے صوبے اچ تعینات فارمیشنز دیاں آپریشنل تیاریاں تے بریفنگ ݙتی ڳئی۔ فیلڈ مارشل سید عاصم منیر افسراں اتے جواناں دے بلند حوصلے، تیاری اتے پیشہ ورانہ مہارت کوں سراہندے ہوئے ملک اتے ایںدے عوام دے تحفظ کیتے انہاں دے غیر متزلزل عزم دا اعتراف کیتا۔ انہاں فارمیشنز کوں ہر ویلھے چوکنا راہوݨ اتے آپریشنل تیاری دے اعلیٰ ترین معیارات برقرار رکھݨ دی ہدایت کیتی۔ انہاں تے زور ݙتا جو مسلح افواج قوم دی غیر متزلزل حمایت نال دہشتگردی کوں شکست ݙیوݨ اتے ملک اچ پائیدار امن اتے استحکام کیتے اپݨے عزم تے ثابت قدم ہین۔ انہاں یادگارِ شہداء تے پھلاں دی چادر چڑھائی، فاتحہ خوانی کیتی اتے مادرِ وطن دے دفاع اتے دہشتگردی دے خلاف جنگ اچ اپݨیاں جاناں وارݨ والیاں کوں خراجِ عقیدت پیش کیتا۔ انہاں آکھیا جو شہداء دیاں انہاں عظیم قربانیاں کوں کݙاھیں نا ٻھلسوں۔ پشاور پڄݨ تے کور کمانڈر پشاور چیف آف آرمی اسٹاف تے چیف آف ڈیفنس فورسز دا استقبال کیتا۔