سکیورٹی ادارے بھارتی پراکسیز دا خاتمہ کر تے رہسن، عطا اللہ تارڑ

لاہور۔ 1 فروری(اے پی پی) وفاقی وزیر اطلاعات و نشریات عطا اللہ تارڑ آکھیے جو جنگ اچ شکست پاروں بھارت کوں ݙاݙھی تکلیف اے، سکیورٹی ادارے بھارتی پراکسیز دا خاتمہ کر تے ای رہسن۔ انھاں اے ڳالھیں لاہور دے حلقہ این اے 127 اچ مسلم لیگ (ن) دے دفتر دے افتتاح ویلھے میڈیا نال الیندے آکھین۔ وفاقی وزیر اطلاعات آکھیے جو بلوچستان اچ “فتنہ الہندوستان” ولوں بزدلانہ حملہ کیتا ڳئے اتے ہک منظم سازش دے تحت امن تباہ کرݨ دی کوشش کیتی گئی اے ٻھل میں سکیورٹی فورسز، پاک فوج، پولیس تے بلوچستان حکومت کوں خراجِ تحسین پیش کرینداں جنھاں 80 توں ودھ دہشت گرداں کوں جہنم واصل کر تے انھاں کوں بھڄݨ تے مجبور کر ݙتے۔ انھاں آکھیا جو دہشت گرد 12 شہراں اچ تباہی مچاوݨ چاہندے ہن، ٻھل ساݙے جواناں اپݨی جان دی پرواہ کیتے بغیر انھاں دا مقابلہ کیتے جیندے نال بلوچستان ہک وڈے نقصان توں بچ ڳئے۔ انہاں آکھیے جو ملک دشمن عناصر اپݨے مذموم مقاصد اچ کامیاب نا تھیسن اتے ایندے کیتے پوری قوم ہک مٹھ اے۔ عطا اللہ تارڑ آکھیے جو انھاں دہشت گرداں کوں بھارت توں مدد ملدی اے اتے سب دے سامݨے اے جو کیویں انڈین میڈیا تے بلوچستان دا ڈھنڈورا پٹیا ویندے۔ انھاں آکھیا جو وزیراعظم شہباز شریف پوری صورتحال تے اکھ رکھی ہوئی اے اتے او پرعزم ہین جو دہشت گردی کوں منݙھو مکایا ویسی۔ انھاں بھارت کوں سنیہا ݙتے ڄڈاں تساں براہِ راست حملہ کیتا ہئی تاں اساں تہاݙا او حال کیتا ہئی جو تساں ہمیش یاد رکھسو، ہݨ تہاݙے انھاں “بچونگڑیاں” (پراکسیز) دا وی خاتمہ کریسوں۔ ہک سوال دے ولدے اچ وفاقی وزیر آکھیا جو بانی پی ٹی آئی دا معمولی علاج انھاں دی مرضی نال تھئے اتے صحتیاب تھیوݨ دے بعد انھاں کوں اڈیالہ جیل منتقل کر ݙتا ڳئے۔ ایں توں پہلے انھاں خواجہ سعد رفیق دے نال دفتر دا افتتاح کیتے۔