پاکستان بین الاقوامی امن و سلامتی اتے اقوامِ متحدہ کوں مرکز ٻݨا تے موثر اتے جامع کثیرالجہتی نظام کیتے کوششاں جاری رکھیسی، محمد اسحاق ڈار

اسلام آباد۔21 ستمبر(اے پی پی)نائب وزیراعظم اتے وزیرِ خارجہ سینیٹر محمد اسحاق ڈار آکھیے جو پاکستان بین الاقوامی امن و سلامتی اتے اقوامِ متحدہ کوں مرکز بݨا تے ہک موثر اتے جامع کثیرالجہتی نظام کوششاں جاری رکھیسی، مکالمہ، سفارت کاری اتے اقوامِ متحدہ دے چارٹر دے مقاصد تے اصولاں تے عمل ہی پائیدار امن دا ہکو رستہ اے۔ ترجمان دفترِ خارجہ دے مطابق نائب وزیراعظم عالمی یومِ امن دے موقع تے عالمی برادری توں مطالبہ کیتے جو او اقوامِ متحدہ دے چارٹر کوں برقرار رکھیندے ہوئیں بین الاقوامی قانون دا احترام اتے تنازعات دے منصفانہ تے پائیدار حل کیتے پرامن ذرائع نال اپݨیاں ذمہ داریاں پوریاں کرے۔ نائب وزیراعظم آکھیا جو اقوامِ متحدہ دے امن مشناں اچ فوجی دستے ݙیوݨ والے وݙے عرصے توں سرگرم اتے صفِ اول دے ملک دے طور تے بین الاقوامی امن اتے سلامتی دے قیام کیتے پاکستان دا پائیدار عزم مسلمہ اے۔ انہاں آکھیا جو پاکستان تنازعات روکݨ اتے انہاں دے حل کیتے مکالمے اتے سفارت کاری نال ہک جامع نقطہ نظر دی حمایت جاری رکھے ہوئی اے، تنازعات دے پرامن تصفیے دے حق اچ اساݙی سفارتی کاوشاں ڄنہاں اچ ایران اتے امریکا ددی ثالثی وی شامل اے، جیڑھی ساݙے عزم دا ثبوت اے۔ انہاں آکھیا جو پاکستان دا موقف اے جو غیر حل شدہ تنازعات علاقائی تے بین الاقوامی عدم استحکام کوں ہوا ݙیندن، پاکستان سمجھدے ڄݙاں اقوام دے تسلیم شدہ حقِ خود ارادیت توں انکار کیتا ونڄے اتے اقوامِ متحدہ دی سکیورٹی کونسل دیاں قرارداداں تے عملدرآمد نہ کیتا ونڄے تاں پائیدار امن نئیں آ سڳدا، اے گالھ غیر ملکی قبضے دی صورتحال اچ خاص طور تے واضح اے ڄنہاں اچ بھارت دے غیر قانونی زیرِ تسلط جموں و کشمیر اتے مقبوضہ فلسطینی علاقے شامل ہن۔ نائب وزیراعظم آکھیا جو پاکستان پرامن اتے خوشحال دنیا کیتے مشترکہ عزم ودھاوݨ کیتے ہک قابلِ اعتماد شراکت دار دے طور تے کردار ادا کرݨ کیتے تیار اے۔