پاݨی کوں بطور جنگی ہتھیار استعمال کرݨ دی کوئی حرکت برداشت نا کیتی ویسی، وزیراعظم شہباز شریف دا آبی ذخائر دے عالمی ݙینہہ تے سنیہا

اسلام آباد۔2 فروری(اے پی پی) وزیراعظم محمد شہباز شریف آکھیے جو پاکستان عالمی قوانین دی پاسداری کریندے ہوئے 1960 دے “سندھ طاس معاہدے” دے مکمل تے منصفانہ نفاذ تے یقین رکھیندے، پاکستان پاݨی کوں بطور جنگی ہتھیار استعمال کرݨ دی کوششاں کوں عالمی قوانین دی سنگین خلاف ورزی سمجھدے۔ آبی ذخائر دے عالمی ݙینہہ اتے اپݨے سنیہے اچ وزیراعظم چتاوݨی ݙتی اے جو پاݨی کوں بطور جنگی ہتھیار استعمال کرݨ دی کوئی حرکت برداشت نا کیتی ویسی۔ انہاں آکھیا جو اے ݙینہہ پاکستان اتے پوری دنیا کوں آبی ذخائر دے تحفظ اتے انتظام دے عزم دا موقع ݙیندے، اے ݙینھ “آبی ذخائر تے روایتی علم: ثقافتی ورثے دی پاسداری” دے مقصد نال منیندا پئے، پاکستان 1971 دے آبی ذخائر دے عالمی معاہدے دا رکن اے جیندے تحت انسانیت کیتے انہاں ذخائر دی اہمیت اتے تحفظ کوں اڳونہا کیتا ویندے۔ انہاں آکھیا جو مضبوط آبی ذخائر کہیں وی ملک کیتے ماحولیاتی اتے معاشی مسئلیاں نال لڑݨ کیتے اہم ہوندن ڄیڑھے ساکوں کریہہ، سیلاب اتے موسم دیاں سختیاں توں بچاوݨ اچ مدد ڈیندن، اساڈیاں جھیلاں، گلیشیئرز اتے ساحلی علاقے لکھاں پاکستانیاں دے روزگار اتے روزمرہ زندگی دا لازمی حصہ ہن، ڄیکر آبی ذخائر گھٹ تھیسن تاں لوکاں دے روزگار اچ کمی آویسی، ملک اچ خوراک مہانگی تھیسی اتے سیلاب یا خشک سالی ڄھئیں خطرات ودھسن۔ وزیراعظم آکھیا جو پاݨی دا تحفظ صرف ماحولیاتی ذمہ داری نئیں ٻھل اے اساڈی سماجی فلاح و بہبود دا ضامن وی اے۔ انہاں واڄح کیتے جو پاکستان پاݨی کوں جنگی ہتھیار دے طور تے استعمال کرݨ دی کوششاں کوں سختی نال مسترد کریندے، اینڄھی کہیں وی کوشش کوں کامیاب نا تھیوݨ ݙتا ویسی۔ انہاں لوکاں کوں آکھیا جو او انفرادی اتے اجتماعی طور تے آبی ذخائر کوں قیمتی قومی اثاثہ سمجھ تے ایندے تحفظ کیتے بھرپور کوشش کرن۔ انہاں عزم کیتا جو پاکستان عالمی سطح تے پاݨی دے منصفانہ، قانونی اتے پرامن استعمال کیتے اپݨیاں کوششاں جاری رکھسی۔