اے پی پی دی ڈیجیٹل رسائی غلط معلومات دا مقابلہ کرݨ تے ملک دا مثبت تاثر ݙکھاوݨ کیتے لازمی اے: عطا اللہ تارڑ

اسلام آباد۔2فروری(اے پی پی)  وفاقی وزیر اطلاعات و نشریات عطا اللہ تارڑ قومی خبر رساں ادارے “ایسوسی ایٹڈ پریس آف پاکستان” (اے پی پی) دے کردار دی اہمیت تے زور ݙیندے آکھیے جو ادارے دی ڈیجیٹل رسائی ودھاوݨ، غلط معلومات (مس انفارمیشن) روکݨ اتے ملک دا مثبت تشخص اڳونہا کرݨ اچ مددگار ثابت تھیسی۔ سنوار کوں اے پی پی ہیڈ کوارٹرز دے دورے ویلھے ہک اجلاس دی صدارت کریندے وفاقی وزیر ہدایت کیتی جو نچلی سطح (گراس روٹ لیول) تے مقامی لوکاں نال پکے رابطے کیتے سوشل میڈیا دے مختلف پلیٹ فارمز کوں بھرپور طریقے نال استعمال کیتا ونڄے، بالخصوص علاقائی زباناں اچ خبراں دی تشہیر کیتی ونڄے۔ وفاقی وزیر اے پی پی دی سرائیکی، بلوچی، براہوی، سندھی اتے پشتو سروسز دے نیوز کانٹینٹ دی وݙی ڈیجیٹل تشہیر دی ہدایت کیتی اتے آکھیا جو ایندے نال عوام دا اعتماد ودھسی تے حکومتی بیانیے کوں ودھ جامع بݨایا ونڄ سگسی۔ وفاقی وزیر عطا اللہ تارڑ اے پی پی دی ڈیجیٹل صلاحیت ودھاوݨ اتے مواد کوں زمانے دے مطابق ٻݨاوݨ کیتے نینگر (نوجوان) سوشل میڈیا ماہرین دی شمولیت دی تجویز وی ݙتی۔ انہاں اعلان کیتا جو تیکھے اے پی پی، پی ٹی وی اتے ڈیجیٹل کمیونیکیشن ڈیپارٹمنٹ دا ہک سانجھا اجلاس سݙیا ویسی تاں جو خبراں اتے ڈیجیٹل میڈیا دے شعبیاں اچ تعاون کیتے ہک وݙا فریم ورک ٻݨایا ونڄے۔ وفاقی وزیر عطا اللہ تارڑ ایم ڈی اے پی پی محمد عاصم کھچی ولوں ادارے اچ شفافیت ڳھن آوݨ اتے کرپشن اچ ملوث ملازمین دے نیٹ ورک کوں بے نقاب کرݨ دی کوششاں دی تعریف کریندے اپݨی مکمل حمایت دا یقین ݙیوایا۔ انہاں کرپشن کیس دے ٹرائل دی پیروی جاری رکھݨ دی وی ہدایت کیتی۔ وفاقی وزیر اطلاعات اے پی پی دے بورڈ آف ڈائریکٹرز دا اجلاس تیکھے سڈاوݨ دی یقین دہانی کرائی اتے ایں سانڳے سیکرٹری انفارمیشن کوں خاص ہدایت جاری کیتن۔ وزیراعظم دے میڈیا کوآرڈینیٹر بدر شہباز اے پی پی ولوں جاری تھیوݨ والے نیوز کانٹینٹ اطمینان کریندے آکھیے جو ادارے دی ڈیجیٹل کیپسٹی اچ اضافہ قومی خبر رساں ادارے دے دائرہ کار کوں مزید وسیع کریسی۔ پی آئی او مبشر حسن آکھیا جو اے پی پی اپݨی قابلِ اعتماد رپورٹنگ دے ذریعے قومی تشخص ٻݨاوݨ اچ مثبت کردار ادا کریندا پئے۔ منیجنگ ڈائریکٹر اے پی پی محمد عاصم کھچی وفاقی وزیر کوں بریفنگ اچ ݙسایا جو اے پی پی دے ڈیٹا سینٹر دی اپ گریڈیشن اتے ویب سائٹ کوں ان ہاؤس سرور تے منتقل کرݨ نال سالانہ 9 ہزار ڈالرز دی بچت تھیندی پئی اے۔ انہاں ڈسایا جو ادارے اچ کیتی گئی تحقیقات اتے آڈٹ اچ 1.24 ارب روپے توں ودھ دی خطیر خورد برد بے نقاب تھئی اے۔ انہاں ݙسایا جو سپریم کورٹ کرپشن کیس دے 6 ملزمان دی ضمانتاں مسترد کریندے ہوئے متعلقہ عدالت کوں ترے مہینے اچ ٹرائل مکمل کرݨ دا حکم ݙتے۔ ملازمین دی ڈگریاں دی تصدیق کیتے سپیشل سیل فعال اے ڄݙاں جو چھٹیاں تے میڈیکل دے طریقے کوں آٹومیٹک (خودکار) کر ݙتا ڳئے۔ اجلاس اچ وزیراعظم دے میڈیا کوآرڈینیٹر بدر شہباز، پرنسپل انفارمیشن آفیسر مبشر حسن، ایگزیکٹو ڈائریکٹر اے پی پی سبین عثمان خٹک اتے ڈائریکٹر نیوز شمائلہ عندلیب وی شرکت کیتی۔ ایندے توں پہلے اے پی پی ہیڈ کوارٹر پڄݨ تے ایم ڈی محمد عاصم کھچی اتے ٻئے سینئر حکام وفاقی وزیر عطا اللہ تارڑ دا استقبال کیتا۔