پاکستان اتے یونیسکو دا ثقافتی ورثے دا تحفظ، تعاون ودھاوݨ تے اتفاق

اسلام آباد۔ 2 فروری(اے پی پی) اکستان اتے اقوامِ متحدہ دے ادارے یونیسکو ثقافتی ورثے کوں بچاوݨ، ثقافت کوں ودھاوݨ تے تکنیکی مہارت اچ ودھارے کیتے ہک ݙوجھے نال تعاون کوں ٻیا ودھاوݨ دا عزم دوہرایا۔ اے اتفاق یونیسکو دے ڈائریکٹر جنرل ڈاکٹر خالد العنانی اتے وفاقی وزیر برائے قومی ورثہ و ثقافت اورنگزیب خان کھچی وچال ہک اعلیٰ سطح ملاقات اچ تھیا۔ اجلاس اچ پاکستان دیاں ثقافتی پالیسیاں کوں عالمی معیار دے مطابق بݨاوݨ اتے ملک دے بھرپور ورثے کوں محفوظ رکھݨ کیتے نویں موقع ڳولݨ تے ڳالھ مہاڑ کیتی گئی۔ یونیسکو دے ڈائریکٹر جنرل ڈاکٹر خالد العنانی ثقافتی ورثے کیتے پاکستان دے اقدامات دی تعریف کریندے آکھیا جو ثقافت ہک مضبوط سماجی سنیہے دا ذریعہ اے جیہڑی مختلف روایات دے باوجود معاشریاں کوں ہک ݙوجھے نال جڑیندی اے۔ انہاں یقین ݙیوایا جو یونیسکو تاریخی ڄاہیں توں فائدے کیتے ڈیجیٹل نظام متعارف کراوݨ اتے ورثہ سیاحت (Heritage Tourism) کوں ودھاوݨ اچ پاکستان دا ہتھ ونݙیسی۔ انہاں “لوک ورثہ” کوں قومی تکنیکی مرکز دے طور تے مضبوط بݨاوݨ تے وی زور ݙتا۔ وفاقی وزیر اورنگزیب کھچی یونیسکو دے مشن نال پاکستان دے عزم کوں دوہرایا۔ انہاں 1963 توں جاری دیرینہ شراکت داری اتے خاص طور تے “سیو موئن جو داڑو” مہم اچ یونیسکو دے کردار دی تعریف کیتی۔ انہاں ڈسایا جو ایں ویلے ٹیکسلا، تخت بھائی، مکلی، لاہور قلعہ، شالامار باغ، روہتاس قلعہ اتے موئن جو داڑو عالمی ورثے دی فہرست اچ شامل ہن۔ وفاقی وزیر آکھیا جو بادشاہی مسجد، ہرن مینار، ہڑپہ تے مہرگڑھ سودھا 25 ٻیاں ڄاہیں کوں عالمی فہرست اچ رلاوݨ کیتے عارضی فہرست اچ رکھا ڳئے۔ انہاں مہرگڑھ دے 9 ہزار سال پراݨے آثار دی اہمیت ودھیندے کراچی اچ “میوزیم ڈویلپمنٹ” دے ادارے دے قیام بارے ݙسایا۔ انہاں ݙسایا جو روایتی موسیقی “بورندو” کوں یونیسکو دی تحفظ دی فہرست اچ رلایا ڳئے۔ ملاقات اچ یونیسکو ہیڈکوارٹر دے چیف عمر منیب، کنٹری نمائندہ فواد پاشائیف، وزیرِ مملکت حذیفہ رحمان اتے پارلیمانی سیکریٹری فرح ناز اکبر وی شریک ہن۔