سینیٹ اجلاس؛ بلوچستان اچ دہشت گرد حملیاں دی شدید مذمت، متفقہ قرارداد منظور

اسلام آباد۔ 2 فروری(اے پی پی) ایوانِ بالا (سینیٹ) دے اجلاس اچ سنوار کوں بلوچستان اچ تھیوݨ والے حالیہ دہشت گرد حملیاں دی شدید مذمت کیتی گئی اتے ایں حوالے نال ہک متفقہ قرارداد منظور کیتی گئی۔ اے قرارداد وفاقی وزیر برائے قانون و انصاف سینیٹر اعظم نذیر تارڑ ایوان اچ پیش کیتی، ڄیکوں ساریاں سیاسی جماعتاں دی مکمل حمایت ہئی۔ ایوان دہشتگرد حملیاں اچ شہید تھیوݨ والے لوکاں دے گھروالیاں نال ہمدردی کریندے زخمیاں دی تیکھے صحت یابی کیتے دعا کیتی۔ سینیٹ ملک دے دفاع اتے شہریاں دے تحفظ کیتے جاناں ݙیوݨ والے سکیورٹی فورسز اتے قانون نافذ کرݨ والے اداریاں دے افسراں اتے جواناں دی جرات، بہادری اتے قربانیاں کوں زبردست خراجِ تحسین پیش کیتا۔ قرارداد اچ بلوچستان اچ امن، ترقی اتے سیاسی شمولیت کیتے سینیٹ دا عزم دوہرایا ڳیا اتے آکھیا ڳئے جو پائیدار امن سماجی و معاشی ترقی، بہتر حکمرانی اتے آئینی حقوق دے احترام دے بغیر ممکن کائنی۔ ایوان واضح کیتا جو دہشت گردی کوں کہیں صورت کامیاب نا تھیوݨ ݙتا ویسی۔ ریاست دی وحدت اتے عوام دی ہمت تشدد، انتہا پسندی اتے دہشت گردی دیاں سازشاں کوں ناکام بݨیسی۔ ایوان مطالبہ کیتا جو دہشت گردی اچ ملوث عناصر، انہاں دے سہولت کاراں اتے مقامی و بین الاقوامی سرپرستاں کوں قانون دے مطابق انصاف دے کٹہرے اچ ڳن آیا ونڄے۔ قرارداد اچ وفاقی اتے صوبائی حکومتاں تے زور ݙتا گیا جو بالخصوص بلوچستان اچ انٹیلی جنس دے اشتراک، سرحدی حفاظت اتے انسدادِ دہشت گردی دے نظام کوں ٻیا تکڑا اتے موثر ٻݨایا ونڄے تاں جو مستقبل اچ اینڄھے واقعیاں کوں روکیا ونڄ سڳے۔