چیئرمین سینیٹ سید یوسف رضا گیلانی دا کمبوڈیا دا سرکاری دورہ

نوم پنہہ۔ 3 فروری (اے پی پی)چیئرمین سینیٹ پاکستان، سید یوسف رضا گیلانی ہک اعلیٰ سطح دے پارلیمانی وفد نال کمبوڈیا دا سرکاری دورہ کیتے، جیکوں پاکستان اتے کمبوڈیا وچال پارلیمانی سفارت کاری اتے تعلقات دے ودھارے کیتے ہک اہم سنگِ میل قرار ݙتا ویندا پئے۔ سینیٹ سیکرٹریٹ دے مطابق، چیئرمین سینیٹ سید یوسف رضا گیلانی اتے کمبوڈیا دی سینیٹ دے صدر سامدیچ ہن سین وچال اہم ملاقات تھئی اے۔ ایں ملاقات اچ تجارت، سرمایہ کاری اتے سیاسی تعلقات کوں نویں جہت ݙیوݨ تے ڳالھ مہاڑ کیتی گئی۔ یوسف رضا گیلانی آکھیا جو اے دورہ ݙوہیں ملکاں دے دوستانہ تعلقات کوں ٻیا تکڑا کرݨ دا ہک عزم اے۔ کمبوڈیا پڄݨ تے یوسف رضا گیلانی دا پرتپاک استقبال کیتا گیا اتے انہاں کوں گارڈ آف آنر وی پیش کیتا گیا۔ چیئرمین سینیٹ کمبوڈیا دے قومی ہیروز دی یادگار تے پھل وی چڑھائے۔ ایں دورے نال ݙوہیں ملکاں وچال عوامی تے پارلیمانی سطح تے اعتماد دا رشتہ مزید پکا تھیسی۔