انتہاپسندی اتے دہشت گردی دے خلاف مربوط اقدامات دا آغاز تھی قئے، وفاقی وزیر عطا اللہ تارڑ

اسلام آباد۔ 3 فروری (اے پی پی) وفاقی وزیر اطلاعات و نشریات عطا اللہ تارڑ سینیٹ کوں ݙسایا اے جو وفاقی حکومت مذہبی ہم آہنگی، نیشنل ایکشن پلان تے موثر بیانیہ سازی دے ذریعے انتہاپسندی دے خاتمے کیتے کم شروع کر ݙتے۔ سینیٹ اچ وقفہ سوالات دے دوران ڳالھ مہاڑ کریندے ہوئیں انہاں آکھیا جو بغیر کہیں مسلکی وانڄھ دے “پیغامِ امن کمیٹی” بݨائی ڳئی اے۔ ایں کمیٹی اچ سارے مکاتبِ فکر دے علمائے کرام اتے اقلیتی برادری دے نمائندے شامل ہن جیہڑے پورے ملک دا دورہ کریسن تاں جو انتہاپسندی دے خلاف امن دا بیانیہ عام کیتا ونڄے۔ وفاقی وزیر آکھیا جو وزارتِ اطلاعات اچ ہک خاص سیل (CVEC) وی بݨایا ڳئے جیہڑا ڈیجیٹل پلیٹ فارمز تے نظر رکھسی۔ انہاں خیبر پختونخوا دے وزیراعلیٰ دی وزیراعظم نال ملاقات کوں ہک چنگا قدم قرار ݙتا تے آکھیا جو ایندے نال صوبے تے وفاق وچال امن و امان دے معاملے تے ہم آہنگی پیدا تھیسی۔ بعد اچ وزیرِ مملکت طلال چوہدری وی سینیٹ کوں ڈسایا جو حکومت نیشنل ایکشن پلان (NAP-II) دے 14 نکات تے سختی نال عمل کریندی پئی اے۔ انہاں آکھیا جو دہشت گردی کوں شکست ݙیوݨ کیتے ساریاں سیاسی قوتاں دا اتحاد ویلھے دی وݙی ضرورت اے۔  انہاں آکھیا جیکر ایوان اجازت ݙیوے تاں حکومت نیشنل ایکشن پلان دی کارکردگی تے تفصیلی بریفنگ ݙیوݨ کیتے تیار اے۔