وزیراعظم شہباز شریف نال قازقستان دے صدر قاسم جومارت توکایووف دی ملاقات

اسلام آباد۔ 4 فروری(اے پی پی) وزیراعظم محمد شہباز شریف اتے قازقستان دے صدر قاسم جومارت توکایووف ݙوہیں ملکاں وچال سیاسی، اقتصادی، دفاعی اتے عوامی رابطیاں دے شعبیاں اچ تعاون ٻیا تکڑا کرݨ دا عزم دوہریندے آندے ݙو سالاں اچ ݙوطرفہ تجارتی حجم ہک ارب ڈالر تئیں ودھاوݨ تے اتفاق کیتے۔ وزیراعظم آفس دے میڈیا ونگ توں جاری بیان دے مطابق جمہوریہ قازقستان دے صدر قاسم جومارت توکایووف وزیراعظم محمد شہباز شریف نال وزیراعظم ہاؤس اسلام آباد اچ ملین۔ انہاں ݙوطرفہ مذاکرات کیتے۔ جمہوریہ قازقستان دے صدر دا وزیراعظم ہاؤس پجݨ تے وزیراعظم محمد شہباز شریف پرتپاک استقبال کیتا۔ معزز مہمان دے اعزاز اچ سرکاری استقبالیہ تقریب وی تھئی۔ صدر قاسم جومارت توکایووف گارڈ آف آنر دا معائنہ وی کیتے۔ ݙوہیں رہنماواں دی ون آن ون ملاقات تھئی جیندے اچ نائب وزیراعظم و وزیر خارجہ محمد اسحاق ڈار اتے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر وی موجود ہن۔ بعد اچ وفود دی سطح تے مذاکرات تھئن جیندے اچ ݙوہیں ملکاں دے اہم کابینہ ممبراں شرکت کیتی۔ وفود دی سطح تے تھیوݨ آلے مذاکرات اچ وزیراعظم صدر توکایووف دے دورہ پاکستان کوں پاکستان-قازقستان ݙوطرفہ تعلقات اچ ہک تاریخی سنگِ میل قرار ݙتے کیونجو اے 23 سالاں دے بعد کہیں قازق صدر دا پہلا دورہ پاکستان اے۔ ݙوہاں رہنماواں ݙوطرفہ تعاون دے پہلوواں دا جائزہ گھدے اتے اعلیٰ سطح رابطیاں تے قائم شدہ ادارہ جاتی طریقہ کار کوں مؤثر بݨاوݨ تے اطمینان کیتے۔ وزیراعظم حالیہ سالاں اچ ݙوطرفہ تجارت اچ بتدریج اضافے کوں اجاگر کریندے ایندی غیر استعمال شدہ صلاحیت توں بھرپور فائدہ چاوݨ دی ضرورت تے زور ݙتے۔ فریقین آندے ݙو سالاں اچ ݙوطرفہ تجارت ہک ارب ڈالر تئیں ودھاوݨ تے اتفاق کیتے اتے اتفاق تھئے جو ݙوہاں ملکاں دے نجی شعبیاں وچال ودھدا ہویا اشتراک تجارت تے سرمایہ کاری دے تعلقات کوں فروغ ݙیوݨ اچ کلیدی کردار ادا کریسی۔ انہاں علاقائی رابطیاں اتے نقل و حمل دے نظام بشمول سڑک، ریل، فضائی تے بحری تعاون کوں فروغ ݙیوݨ کیتے قریبی تعاون دی ضرورت تے وی زور ݙتے۔ پاکستان-قازقستان تعلقات کوں مزید ودھاوݨ دے عزم دا اعادہ کریندے ہوئیں انہاں اعتماد کیتے جو دورے دے نتائج، جیندے اچ 37 مفاہمتی یادداشتاں اتے معاہدیاں تے دستخط اتے “سٹریٹجک شراکت داری دے قیام” بارے مشترکہ اعلامیہ شامل اے، تعاون دے نویں موقع پیدا کریسن۔ صدر قاسم جومارت توکایووف شاندار مہمان نوازی تے وزیراعظم شہباز شریف دا شکریہ ادا کیتے اتے وزیراعظم کوں ایں سال قازقستان دے دورے دی دعوت وی ݙتی۔ انہاں اتفاق کیتے جو سینئر وزراء اتے متعلقہ حکام تے مشتمل ہک ورکنگ کمیٹی قائم کیتی ویسی جیہڑی آندے پنج سالاں دے دوران ݙوطرفہ تجارت تے اقتصادی تعاون دے فروغ کیتے ہک جامع روڈ میپ ٻݨیسی۔