پاکستان-قازقستان بزنس فورم: آندے 2 سال اچ تجارتی حجم ہک ارب ڈالر تئیں ودھاوݨ، ریل اتے روڈ رابطیاں تکڑے کرݨ تے اتفاق

اسلام آباد۔ 4 فروری(اے پی پی) پاکستان اتے قازقستان باہمی اقتصادی تعلقات اتے تجارتی حجم ٻیا ودھاوݨ دا عزم دوہریندے آندے 2 سال اچ تجارتی حجم ہک ارب ڈالر تئیں ڳھن ونڄݨ تے زور ݙتے، تجارت و اقتصادی شعبے اچ تعاون کوں وسعت ݙیوݨ کیتے 5 سالہ روڈ میپ تے عمل کیتا ویسی۔ وزیراعظم محمد شہباز شریف وسط ایشیائی ریاستاں کوں پاکستانی بندرگاہواں دے ذریعے عالمی منڈیاں تئیں رسائی دے موقعیاں توں فائدہ چاوݨ، ریل اتے روڈ رابطیاں کوں مضبوط بݨاوݨ تے زور ݙیندے آکھیے جو ݙوہاں ملکاں وچال طے پاوݨ والے 37 سمجھوتے ݙوطرفہ تعاون اچ سنگ میل ثابت تھیسن۔ ٻئے پاسو قازقستان دے صدر قاسم جومارت توکایووف ݙوطرفہ تعلقات کوں تزویراتی شراکت داری (اسٹریٹجک پارٹنرشپ) اچ بدلݨ کوں ہک اہم سنگ میل قرار ݙیندے ہوئیں آکھیے جو قازقستان، ترکمانستان، افغانستان، پاکستان ٹرانسپورٹ کوریڈور وݙی اہمیت آلا اے، پاکستانی کمپنیاں کوں قازقستان اچ کاروبار کیتے سازگار ماحول ݙتا ویسی۔ اسلام آباد اچ پاکستان-قازقستان بزنس فورم تھئے جیندے اچ وزیراعظم محمد شہباز شریف اتے قازقستان دے صدر قاسم جومارت توکایووف شریک تھئے۔ فورم اچ قازقستان دی 50 توں ودھ اتے پاکستان دی تقریباً 250 کمپنیاں دے نمائندیاں شرکت کیتی۔ وزیراعظم فورم اچ شریک کاروباری برادری کوں خوش آمدید آھدے ہوئیں آکھیا جو اے نشست ساݙے مستقبل کیتے ٻہوں اہم اے، پاکستان وسط ایشیائی ریاستاں کوں تجارت کیتے اپنی بندرگاہواں دے ذریعے قریب ترین راستہ ݙے سڳدے، قازقستان اپݨیاں مصنوعات گوادر اتے کراچی پورٹ دے ذریعے ایکسپورٹ کر سڳدے۔ انہاں ریل اتے روڈ رابطے کوں “گیم چینجر” قرار ݙتا۔

وزیراعظم موجودہ تجارتی حجم، جیہڑا 250 ملین ڈالر اے، کوں اصل صلاحیت توں ٻہوں گھٹ قرار ݙتا تے آکھیا جو اے ݙوہاں ملکاں دے تعلقات دی درست عکاسی نئیں کریندا، آندے 2 سال اچ ہک ارب ڈالر دا ہدف حاصل کرݨ کیتے ہر ممکن اقدامات کریسوں۔ وزیراعظم ݙسایا جو تجارتی تعاون کیتے 5 سالہ روڈ میپ تے اتفاق تھئے جیندے اچ احسن اقبال پاکستان  ولوں جݙاں جو قازقستان دے نائب وزیراعظم اپنی سائیڈ دی سربراہی کریسن۔ قازقستان دے صدر قاسم جومارت توکایووف فورم نال خطاب کریندے ہوئیں آکھیا جو ݙوطرفہ تعلقات کوں تزویراتی شراکت داری اچ بدلݨ ہک وݙا قدم اے۔ انہاں سیاحت، زراعت، تعلیم، آئی ٹی اتے صحت دے شعبیاں اچ تعاون تے اتفاق کیتا۔ قازق صدر آکھیا جو بین الحکومتی کمیشن دے ذریعے “بزنس ٹو بزنس” رابطیاں کوں ودھایا ویسی۔ انہاں زراعت دے شعبے اچ تعاون دے وسیع امکانات دا ݙسیندے آکھیا جو ݙوہیں ملک زرعی مصنوعات دے ذریعے عالمی مارکیٹ اچ اپݨا حصہ ودھا سڳدن۔ انہاں ڈیجیٹلائزیشن دے حوالے نال حکومتِ پاکستان دے اقدامات دی تعریف کیتی اتے ݙسایا جو ہک ہزار توں ودھ پاکستانی طلباء قازقستان اچ طب، انجینئرنگ اتے ٻئے شعبیاں اچ پڑھدے پئن۔ ایندے توں پہلے وفاقی وزیر تجارت جام کمال خان بزنس فورم نال خطاب کیتا۔ انہاں آکھیا جو وسط ایشیائی ریاستاں اچ قازقستان دی معیشت سب توں مضبوط اے اتے گزشتہ ترائے سالاں اچ ݙوطرفہ تجارتی حجم اچ ݙوڑا ودھارا تھئے۔ انہاں ٹرانزٹ ٹریڈ معاہدے کوں تجارتی سرگرمیاں کیتے اہم سنگ میل قرار ݙتا۔