چیئرمین سینیٹ سید یوسف رضا گیلانی دی کمبوڈیا دے بادشاہ تے وزیراعظم نال ملاقاتاں

وم پنہ۔ 4 فروری (اے پی پی)چیئرمین سینیٹ سید یوسف رضا گیلانی اپݨے سرکاری دورے اچ کمبوڈیا دے بادشاہ پریہ بات سمڈیچ پریہ بوروم نیتھ نوردوم سیہامونی نال ملین۔ ملاقات اچ پاکستان اتے مملکتِ کمبوڈیا وچال ݙوطرفہ تعلقات کوں مزید مستحکم بݨاوݨ، پارلیمانی سفارتکاری دے فروغ، سیاسی رابطیاں تے عوامی سطح تے تعاون ودھاوݨ دے عزم دا اعادہ کیتا گیا۔ ایں موقع تے چیئرمین سینیٹ دے کٹھے سینیٹرز ڈاکٹر زرقا سہروردی تیمور، سینیٹر عابد شیر علی، سینیٹر ضمیر حسین گھمرو اتے چیئرمین سینیٹ دی مشیر و بین الپارلیمانی سپیکرز کانفرنس (آئی ایس سی) دی سفیر مصباح کھر وی موجود ہن۔ سید یوسف رضا گیلانی پاکستان دی حکومت تے عوام ولوں کمبوڈیا دے بادشاہ کیتے نیک تمناواں پچیندے انہاں دی مدبرانہ قیادت، قومی اتحاد، ثقافتی ورثے دے تحفظ تے کمبوڈین عوام دی فلاح و بہبود کیتے خدمات کوں سراہیا۔

انہاں کمبوڈیا دی قیادت تے عوام کوں سماجی و اقتصادی ترقی، سیاسی استحکام تے قومی ہم آہنگی کیتے مسلسل پیش رفت تے مبارکباد وی ݙتی۔ چیئرمین سینیٹ ݙسایا جو اپݨے دورِ وزارتِ عظمیٰ اچ ایشیا پیسفک کمبوڈیا کانفرنس اچ شریک تھئے ہن، ایں موقع تے اوں ویلھے دے وزیراعظم سمڈیچ تیچو ہن سین نال ملاقات وی تھئی ہئی۔ انہاں جولائی 2023ء اچ کمبوڈیا دا دورہ کریندے ہوئیں انٹرنیشنل لیڈرشپ کانفرنس اچ شرکت تے عام انتخابات دا بین الاقوامی مبصر دی حیثیت نال مشاہدہ وی کیتا ہئی جیہڑا جمہوری عمل اتے عالمی پارلیمانی تعاون کیتے پاکستان دی مستقل حمایت دا مظہر اے۔ پارلیمانی تعاون تے زور ݙیندے چیئرمین سینیٹ 2016ء اچ پاکستان تے کمبوڈیا دے سینیٹس وچال طے پاوݨ والی مفاہمتی یادداشت دا ݙسایا اے پارلیمانی فرینڈشپ گروپس، کمیٹی سطح دے تبادلیاں اتے علاقائی پارلیمانی فورمز اچ فعال شرکت کوں مزید وسعت ݙیوݨ تے زورع ݙتے۔ انہاں آکھیا جو پارلیمانی روابط تجارت، سرمایہ کاری اتے علاقائی رابطیاں دے فروغ اچ اہم کردار ادا کر سڳدن۔ سید یوسف رضا گیلانی نومبر 2025ء اچ اسلام آباد اچ تھیوݨ والی پہلی آئی ایس سی کانفرنس اچ کمبوڈیا دی فعال شرکت کوں سراہیا۔