اپݨے کشمیری ٻھیݨ ٻھراواں دے حقِ خودارادیت دی منصفانہ جدوجہد دی مکمل حمایت جاری رکھسوں، وزیراعظم شہباز شریف

اسلام آباد۔ 5 فروری (اے پی پی)وزیراعظم محمد شہباز شریف یومِ یکجہتی کشمیر تے پاکستان دے عوام اتے حکومت ولوں کشمیری ٻھیݨ ٻھراواں دے حقِ خودارادیت دی منصفانہ جدوجہد دی اصولی اتے غیر متزلزل حمایت دا عزم دوہریندے آکھیے جو جموں و کشمیر دا تنازعہ اقوامِ متحدہ دے ایجنڈے تے دیرینہ حل طلب تنازعیاں اچ شامل اے، اٹھ ݙھاکیاں توں بھارت دی ہٹ دھرمی پاروں کشمیری عوام کوں بنیادی حق توں محروم رکھا ویندا پئے، او ݙینہہ دور کائنی جݙاں جموں و کشمیر دے عوام بھارتی قبضے دیاں زنجیراں توں چھٹ تے خوف توں آزاد مستقبل اچ اپݨا ڄیوݨ لنڳھیسن اتے سکھ دا ساہ ڳھنسن۔ وزیراعظم آفس دے میڈیا ونگ توں یومِ یکجہتی کشمیر دے موقع تے جاری سنیہے اچ وزیراعظم آکھیا جو ہر سال 5 فروری کوں یومِ یکجہتی کشمیر منایا ویندے، اے ݙینہہ ایں عزم دی تجدید کریندے جو پاکستان دے عوام اتے حکومت اپݨے کشمیری ٻھراواں دی حمایت جاری رکھسن۔ انہاں آکھیا جو 5 اگست 2019ء کوں بھارت غیر قانونی اتے یکطرفہ اقدامات دا ہک اینڄھا سلسلہ شروع کیتے جیندا مقصد مقبوضہ جموں و کشمیر اتے اپݨے جبری تسلط کوں مضبوط بݨاوݨ اے۔ انہاں آکھیا جو پاکستان کشمیری عوام دی آزادی دی جدوجہد اچ اپنی مکمل اخلاقی، سفارتی تے سیاسی حمایت اوں ویلھے تئیں جاری رکھیسی ڄٖ تئیں او اقوامِ متحدہ دی سرپرستی اچ وعدے دے مطابق آزاد اتے غیر جانبدار رائے شماری دے ذریعے اپݨا حقِ خودارادیت حاصل نئیں کر ڳھندے۔ انشاء اللہ تاریکی دے اے ݙینہہ تیکھے آزادی دی سڄاکی سویل اچ وٹیڄ ویسن۔