پاکستان دا یومِ یکجہتیٔ کشمیر تے کشمیری عوام نال یکجہتی دے عزم دا اعادہ، دفترِ خارجہ دا بیان

اسلام آباد۔ 5 فروری (اے پی پی) حکومتِ پاکستان اتے پاکستانی عوام یومِ یکجہتی کشمیر منائے جیندے نال او اپݨے کشمیری ٻھراواں تے ٻھیݨیں نال انہاں دے حقِ خودارادیت دے حصول دی منصفانہ جدوجہد اچ شانہ بشانہ کھڑے تھیوݨ دے پختہ عزم دوہریندے پئن۔ ترجمان دفترِ خارجہ دے مطابق ایںموقع تے اپݨے خصوصی سنیہے اچ صدرِ مملکت، وزیرِ اعظم اتے نائب وزیرِ اعظم و وزیرِ خارجہ مسئلہ کشمیر دے منصفانہ حل کیتے پاکستان دی غیر متزلزل اخلاقی، سفارتی اتے سیاسی حمایت دا اعادہ کیتا اتے اتے آکھیے جو پاکستان سارے بین الاقوامی فورمز تے کشمیری عوام دے حقوق کیتے آواز چیندا رہسی۔ نائب وزیرِ اعظم تے وزیرِ خارجہ اقوامِ متحدہ دی سلامتی کونسل اتے جنرل اسمبلی دے صدور، اقوامِ متحدہ دے سیکریٹری جنرل، اقوامِ متحدہ دے ہائی کمشنر برائے انسانی حقوق تے تنظیمِ تعاونِ اسلامی (او آئی سی) دے سیکریٹری جنرل کوں خطوط ٻھیڄن جیندے اچ بھارت دے غیر قانونی طور تے زیرِ تسلط جموں و کشمیر اچ سنگین صورتحال دو فوری توجہ ݙیوائی گئی۔ اقوامِ متحدہ دی سلامتی کونسل دی متعلقہ قرارداداں تے عمل درآمد تے زور ݙیندے ہوئیاں نائب وزیرِ اعظم اقوامِ متحدہ دی نگرانی اچ مقبوضہ جموں و کشمیر اچ آزاد، منصفانہ اتے غیر جانبدارانہ رائے شماری کراوݨ دا مطالبہ کیتا تاں جو کشمیری عوام دی خواہشات دا تعین کیتا ونڄ سڳے۔ انہاں اقوامِ متحدہ تے او آئی سی دی قیادت تے وی زور ݙتا جو او مقبوضہ جموں و کشمیر اچ تشویشناک انسانی حقوق دی صورتحال قابو کرݨ اتے ایندے اچ بہتری کیتے مؤثر کردار ادا کرن۔ دفترِ خارجہ دے مطابق یومِ یکجہتیٔ کشمیر توں پہلے اسلام آباد اچ تعینات سفارت کاراں کیتے ہک جامع بریفنگ رکھی ڳئی جیندے اچ انہاں کوں مقبوضہ جموں و کشمیر اچ موجودہ صورتحال اتے جاری انسانی حقوق دی خلاف ورزیاں دا ݙسایا ڳیا۔ وزارتِ خارجہ دے افسران اتے عملے جناح ایونیو تے یومِ یکجہتیٔ کشمیر واک کیتی جیندے ذریعے کشمیری کاز نال بھرپور یکجہتی اتے حمایت کیتی ڳئی۔ ایں توں علاوہ پاکستان دے سفارتی مشنز اچ ڄڳ اچ سیمینارز، ویبینارز، عوامی مظاہریاں تے تصویری نمائشاں سودھا مختلف سرگرمیاں کیتاں ڳن جیندا مقصد کشمیری عوام نال بھرپور یکجہتی اتے بھارتی غیر قانونی طور تے مقبوضہ جموں و کشمیر اچ جاری انسانی حقوق دی خلاف ورزیاں کوں اڳونہا کرݨ اے۔