مسئلہ کشمیر ڄڳ اچ اجاگر تھی چکا، معرکہ حق اچ بھارت دا ماݨ مٹی اچ ملا ݙتے، وزیرِ اعظم محمد شہباز شریف

مظفر آباد۔ 5 فروری(اے پی پی) وزیرِ اعظم محمد شہباز شریف مہاجرین دا وظیفہ 3500 توں ودھا تے 6 ہزار کرݨ، مظفر آباد اچ دانش یونیورسٹی کیمپس اتے آسان خدمت مرکز قائم کرݨ، مزید 1700 طلباء کوں ایں مہینے لیپ ٹاپ، ایجوکیشن انڈومنٹ فنڈ دے تحت تعلیمی وظائف ݙیوݨ، سکولاں دی چھتاں کیتے ہک ارب اتے ہریام پل دی تعمیر کیتے 10 ارب روپے ݙیورݨ سودھا آزاد کشمیر دی ترقی کیتے کئی اقدامات دا اعلان کریندے آکھیے جو پورے پاکستان آلی کار آزاد کشمیر دی ترقی وی انہاں کوں ݙاݙھی پیاری اے، کشمیر اچ کوئی وی حکومت ہووے وفاق دا تعاون جاری رہسی، معرکہ حق اچ بھارت دا گھمنڈ مٹی اچ ملا ݙتا، مسئلہ کشمیر ڄق اچ اجاگر تھی چکیے، بھارت جیڑھے محاذ تے جیویں اتے جیڑھی زبان استعمال کریسی اوکوں اوندا اوویں ای جواب ملسی، ایندی پراکسیز دا وی اوہو حشر کریسوں جیہڑا ایندے جہازاں دا کیتا ہئی۔ اے قآلھ انہاں مظفر آباد اچ آزاد کشمیر قانون ساز اسمبلی نال خطاب کریندے آکھی۔

اس موقع تے نائب وزیرِ اعظم اسحاق ڈار، وزیرِ اعظم آزاد جموں و کشمیر راجہ فیصل ممتاز راٹھور، وفاقی وزراء، آزاد کشمیر قانون ساز اسمبلی دے ارکان، سابق وزرائے اعظم تے حریت قائدین سودھا سیاسی جماعتاں دی قیادت وی موجود ہئی۔ وزیرِ اعظم محمد شہباز شریف آکھیا جو او اج کشمیریاں نال یکجہتی کریندے شہدائے کشمیر کوں خراجِ عقیدت پیش کرݨ کیتے آئن، برہان وانی، سید علی گیلانی، آسیہ اندرابی، یاسین ملک اتے میر واعظ عمر فاروق سودھا کشمیری رہنماواں، تریمتیں، ٻالاں تے بزرگاں جدوجہد دی تاریخ رقم کیتی اے، انہاں دی قربانیاں نال کشمیر دی دھرتی سرخ اتے بھارت دا اصل چہرہ دنیا دے سامݨے بے نقاب تھی چکیے، دنیا کوں ݙسا ݙتے جو کشمیر نہ بھارت دا حصہ ہئی، نہ ہے اتے نہ ہوسی۔ انہاں آکھیا جو کشمیر کوں قائدِ اعظم محمد علی جناح پاکستان دی شہہ رڳ قرار ݙتا ہئی، ایہا پاکستان دی خارجہ پالیسی دی بنیاد اے۔ انہاں واضح کیتا جو تنازعہ کشمیر دا پائیدار حل صرف تے صرف کشمیری عوام دی امنگاں اتے اقوامِ متحدہ دی سلامتی کونسل دی قرارداداں تے عمل نال ای ممکن اے، ایندے سوا بھارت کولو ٻیا کوئی رستہ کائنی، پاکستان کشمیریاں کوں انہاں دا حق ملݨ تائیں انہاں دی حمایت جاری رکھسی۔ انہاں آکھیا جو بھارت دے خلاف معرکہ حق صرف ساݙی افواج دی پیشہ ورانہ مہارت دی فتح کائنی ٻھل اے کشمیری عوام دی قربانیاں دی وی فتح اے، جیندے بعد کشمیر کاز پوری دنیا اچ پوری قوت نال زندہ تھیا، بھارت دے کوڑے بیانیے دا دفن تھیوݨ ساݙی سفارتی کامیابی اے۔

وزیرِ اعظم آکھیا جو بھارت ذلت آمیز شکست دے بعد اپݨی پراکسیز دے ذریعے پاکستان اچ ولا دہشت گردی ودھا ݙتی اے، بھارت دے جارحانہ، توسیع پسندانہ اتے تسلط پسندانہ عزائم کوں ترک کیتے ونڄݨ تئیں خطے اچ امن قائم کائنی تھی سڳدا۔ انہاں آکھیا جو پاکستان دی مسلح افواج اتے سکیورٹی فورسز بھارت دی دہشت گردی اچ ملوث پراکسیز دا وی اوہو حشر کریسن جیہڑا ایندے لڑاکا طیاریاں دا تھیا ہئی، امن چاہندے ہیں پر برابری اتے انصاف دی بنیاد تے، کشمیر اتے فلسطین دے عوام کوں انہاں دی مرضی نال جیوݨ دا حق ملݨا دنیا دی جمہوریت پسندی تے انصاف پسندی دا امتحان اے، بین الاقوامی قوانین تے اصول ایں حق دی حمایت کریندن، پاکستان اسلامی ملکاں نال رل تے غزہ اچ امن قائم کرݨ کیتے عملی قدم چاتے، فلسطین اتے کشمیر تے اپݨے اصولی موقف تے رہندے ہوئیاں پاکستان تنازعات دے پائیدار حل کیتے اپݨا فعال، متحرک تے عملی کردار ادا کریندا رہسی۔ وزیرِ اعظم ایں مہینے ٻئے 1700 آزاد کشمیر دے طلباء کوں لیپ ٹاپس ݙیوݨ تے ایجوکیشن انڈومنٹ فنڈ دے تحت تعلیمی وظائف دا اعلان وی کیتا جیندے ذریعے ٻاہرلے ملک اعلیٰ تعلیم دے مواقع وی حاصل ہن۔ انہاں سکولاں دی چھتاں کیتے ہک ارب، واٹر سپلائی سکیم تے ہائیڈرو پاور پراجیکٹ کیتے 9.4 ارب، ہریام برج کیتے 10 ارب، یونیورسٹی آف کوٹلی کیتے 1.46 تے وومن یونیورسٹی باغ کیتے وی 1.46 ارب روپے دے فنڈز مختص کرݨ دا اعلان کیتا۔ انہاں آکھیا جو آزاد کشمیر وچ کوئی وی حکومت ہووے وفاق اڳوں ودھ تے تعاون کریسی۔

وزیرِ اعظم محمد شہباز شریف نے یادگارِ شہداء تے وی حاضری ݙتی تے پُھلاں دی چادر چا تے کشمیری شہداء کوں خراجِ عقیدت پیش کیتا۔