صدرِ مملکت آصف علی زرداری دی ازبک صدر شوکت مرزائیوف نال ملاقات

اسلام آباد۔ 6 فروری(اے پی پی)صدرِ مملکت آصف علی زرداری اتے ازبک صدر شوکت مرزئیوف ایوان صدر اسلام اباد اچ ملین، انہاں پاکستان ازبکستان ݙوطرفہ روابط، تجارت اتے عوامی سطح تے رابطیاں دے شعبیاں اچ قریبی تعاون ودھا تے تعلقات ٻئے تکڑا کرݨ تے اتفاق کیتے۔ ایوانِ صدر دے میڈیا ونگ دے مطابق صدرِ مملکت آصف  ذرداری صدر شوکت مرزائیوف دا خیر مقدم کریندے ہوئیں آکھیے جو اے دورہ نتیجہ خیز اتے مستقبل کیتے اہم اے۔

انہاں صدر شوکت مرزائیوف کوں ہک دور اندیش رہنما قرار ݙیندے آکھیے جو انہاں دی قیادت اچ ازبکستان ہک جدید اتے خوشحال ملک ٻݨ تے اٻھریے اتے انہاں دیاں خدمات کوں علاقائی و بین الاقوامی امن دے ودھارے کیتے ٻہوں منیا ویندے۔ انہاں ݙوطرفہ تعلقات تے اطمینان کریندے تجارت، روابط، دفاع، سلامتی، ثقافت اتے ورثے دے شعبیاں اچ تعاون کوں ٻیا ودھاوݨ کیتے پاکستان دا عزم دوہرایا۔ صدرِ مملکت ازبکستان-افغانستان-پاکستان ریلوے منصوبے سودھا علاقائی رابطیاں دے اقدامات دی اہمیت تے زور ݙتا اتے باقی بچݨ والے چیلنجاں نال نمٹݨ کیتے مشترکہ کوششاں کوں اڳونہا کیتے۔ صدر آصف علی زرداری آکھیا جو ݙوطرفہ تجارت ودھاوݨ ضروری اے اتے تعلقات دی اصل معاشی

صلاحیت کوں ورتݨا ہوسی تاں جو باہمی تجارت کوں 2 ارب ڈالر تئیں ودھایا ونڄ سڳے۔ انہاں ݙوہاں ملکاں وچال تجارت اتے سرمایہ کاری کوں سہارا ݙیوݨ کیتے مالیاتی اداریاں بالخصوص بینکاں وچال تعاون تے سہولت دی لوڑھ تے زور ݙتے۔ صدر شوکت مرزائیوف آکھیا جو ازبکستان پاکستان تکڑے سنڳتی ہین، ساکوں مختلف سطحاں تے ݙوطرفہ رابطیاں اچ مسلسل اضافے، تجارت دے فروغ، مشترکہ منصوبیاں اچ اضافے اتے معیشت دے ترجیحی شعبیاں اچ تعاون دے منصوبیاں تے عمل کرݨا ہوسی۔ ازبکستان دے صدر سیاسی مکالمے کوں مزید مضبوط بݨاوݨ، تجارت، معیشت اتے سرمایہ کاری دے تعلقات دے فروغ اتے کاروباری روابط مزید فعال بݨا تے عملی تعاون اچ وسعت دی لوڑھ تے زور ݙتے۔ انہاں صدر آصف علی زرداری کوں ازبکستان دا سرکاری دورہ کرݨ دی دعوت وی ݙتی اتے اعلان کیتے جو ݙوہیں ملکاں وچال ݙو اضافی براہِ راست پروازاں شروع کیتیاں ویسن۔ انہاں علاقائی صورتحال، امن، استحکام اتے سلامتی نال جڑے امور تے ڳالھ مہاڑ کیتی۔ وفد دی سطح تے ڳالھ مہاڑ اچ پاکستان ولوں نائب وزیراعظم تے وزیر خارجہ سینیٹر محمد اسحاق ڈار، وزیر تجارت جام کمال خان، وفاقی وزیر ریلوے محمد حنیف عباسی، وزیراعلیٰ بلوچستان سرفراز احمد بگٹی، صنعت و پیداوار کیتے معاون خصوصی ہارون اختر، سینیٹر سلیم مانڈوی والا، رکن قومی اسمبلی راجہ پرویز اشرف، سابق چیئرمین سینیٹ نیئر حسین بخاری، ازبکستان اچ پاکستان دے سفیر اتے سیکرٹری خارجہ شرکت کیتی۔ ازبک وفد اچ صدر دے مشیر عبدالعزیز کاملوف، وزیر دفاع شوخرات خالمحمدوف، وزیر سرمایہ کاری لذیذ قدرتوف، وزیر ٹرانسپورٹ الخام مخکموف اتے ٻئے وزراء شامل ہین۔ صدر آصف علی زرداری ازبکستان دے صدر شوکت مرزائیوف کوں “نشانِ پاکستان” دا اعزاز وی ݙتے اتے انہاں کوں ظہرانی وی ݙتا ڳئے۔