ترلائی امام بارگاہ خودکش حملہ: 31 بندے شہید، 100 توں ودھ زخمی؛ حملہ آور دی سنڄاݨ تھی ڳئی اے، وزیر مملکت داخلہ

اسلام آباد۔6 فروری (اے پی پی)وزیر مملکت داخلہ طلال چوہدری آکھیے جو ترلائی امام بارگاہ خودکش حملے اچ 31 ڄݨٖ شہید اتے سو توں ودھ زخمی تھئن۔ خودکش حملہ آور امام بارگاہ دیاں اگلیاں صفاں تئیں پڄݨ چاہندا ہئی، ٻھل روکݨ تے اوں فائرنگ کیتی اتے اپݨے آپ کوں دھماکے نال اݙا ݙتا۔ انہاں آکھیا جو حملہ آور دی سنڄاݨ تھی ڳئی اے، سارے امدادی ادارے واقعے دے 10 توں 12 منٹ اچ پڄ ڳئے ہن، اے دہشت گرد اللہ دی راہ اچ نئیں ڈالراں دی خاطر دھماکے کریندن، جتنا زیادہ جانی نقصان تھیندے، انھاں کوں اتنے زیادہ پیسے ملدن۔ انہاں آکھیا جو واقعے دی تفتیش جاری اے اتے سہولت کاراں دا پیچھا کیتا ویندا پئے۔ وزیر اعظم دے حکم تے 72 ڳھنٹے اچ ہینڈلرز بارے تفصیلی رپورٹ پیش کر ݙتی ویسی۔ ہک سول دے ولدے اچ طلال چوہدری آکھیا جو سکیورٹی دی ناکامی کائنی، ٻھل اے ہک ردعمل اے کیوں جو پاکستان دہشت گردی دے خلاف فرنٹ لائن ریاست اے اتے اساں پوری دنیا دی حفاظت کریندے پئے ہیں۔ دہشت گرد “پاکستان” کوں کمزور کرݨ چاہندن، ڄیکر اے کندھ کمزور تھئی تاں اے بھاء ساڈیاں سرحداں تئیں محدود نہ رہسی، اساں ہک ذمہ دار ریاست دے طور تے اے جنگ جِتدے پئے ہیں۔ انھاں آکھیا جو اسلام آباد ہݨ ‘سیف سٹی’ توں ودھ تے ‘سمارٹ سٹی’  ٻݨݨ ویندا پئے، ایں سال جدید کیمریاں اتے ٹیکنالوجی تے وڈی سرمایہ کاری کیتی ویندی پئی اے، اسلام آباد پولیس آئی جی دی قیادت اچ ہر کیس حل کیتے اتے 100 فیصد ملزمان کوں انجام تئیں پچائے۔ انہاں آکھیا جو امام بارگاہ دا سکیورٹی نظام بالکل ٹھیک ہئی، تہوں حملہ آور اندرو نئین ور سڳیا۔ انہاں آکھیا جو پاکستان اچ میلے اتے رونقاں جاری رہسن، کیوں جو دشمن چاہندے جو پاکستان اڳو تے نا ودھے ٻھل انھاں دے ارادے پورے نا تھیوݨ ڈیسوں، ساڈے حوصلے بلند ہین۔