قازقستان دے صدر دے دورہ پاکستان تے تفصیلی دستاویزی فلم جاری

اسلام آباد۔8 فروری(اے پی پی)قازقستان دے صدر قاسِم جومارت توکائیف دے 3 تے 4 فروری 2026 کوں تھیوݨ والے تریخی دورہ پاکستان کوں اجاگر کرݨ کیتے قازقستان دے صدارتی ٹی وی اینڈ ریڈیو کمپلیکس ہک تفصیلی دستاویزی فلم جاری کیتی اے، جیندا عنوان “قازقستان–پاکستان اسٹریٹجک پارٹنرشپ: ݙوہیں پاسے دے تعلقات اچ ہک نواں بلند مقام” رکھیا ڳئے۔ اے 23 سال دے بعد کہیں وی قازق سربراہِ مملکت دا پہلا دورہ پاکستان ہئی، جیکوں ہک اہم سنگِ میل سمجھیا ویندا پئے۔ دستاویزی فلم اچ صدر توکائیف دے دورے دے اہم لمحات ݙکھائے ڳئن، جیندے اچ پاکستانی فضائی حدود اچ داخل تھیندے ویھلے پاکستان ایئر فورس دے چھی جنگی جہازاں ولوں انہاں دے طیارے کوں حفاظتی اسکارٹ پیش کرݨ وی شامل اے۔ فلم اچ صدر آصف علی زرداری اتے وزیراعظم شہباز شریف ولوں نور خان ایئر بیس تے استقبال اتے بعد اچ تھیوݨ والیاں ملاقاتاں دے مناظر وی شامل ہین۔ ایں موقع تے ݙوہیں ملکاں مشترکہ اعلامیے تے دستخط کیتے اتے تجارت، دفاع، تعلیم تے ثقافت سودھا کئی شعبیاں اچ تعاون ودھاوݨ تے اتفاق کیتا۔ صدر توکائیف کوں پاکستان دا اعلیٰ ترین سول اعزاز “نشانِ پاکستان” وی عطا کیتا گیا۔