موسمیاتی دہشت گردی کہیں وی ٻئی دہشت گردی توں ودھ خطرناک اے، ڈاکٹر مصدق ملک

لاہور۔ 8 فروری(اے پی پی)وفاقی وزیر برائے موسمیاتی تبدیلی ڈاکٹر مصدق ملک آکھیے جو پاکستان کوں موسمیاتی تبدیلی دے بدترین اثرات دا سامݨا اے اتے اے “موسمیاتی دہشت گردی” کہیں وی ٻئی دہشت گردی توں ودھ خطرناک اے۔ لاہور اچ ہک تقریب نال خطاب کریندے ہوئے انہاں آکھیا جو حالیہ سیلاب دی وجہ توں 2 کروڑ ٻال سکولاں توں محروم تھی گئن۔انہاں آکھیا جو عالمی سطح تے آلودگی اچ پاکستان دا حصہ ہک فیصد توں وی ڳھٹ اے، پر اساں دنیا دے وݙے ملکاں دی کھنݙائی ہوئی آلودگی دا خمیازہ ٻھڳتیندے پئے ہیں۔ مصدق ملک دے مطابق، سیلاب دی وجہ توں ملکی معیشت کوں جی ڈی پی دے9.8  فیصد دے برابر نقصان تھئے اتے لکھاں خاندان غریبی اچ لڳ ڳئن۔ انہاں اعلان کیتا جو حکومت نوجواناں کیتے “گرین فیلڈ پروگرام” شروع کریندی پئی اے تاں جو نویں بزنس ماڈلز کوں سرمایہ کاری مل سگے۔ انہاں آکھیا جو حکومت متاثرہ علاقیاں دی بحالی کیتے 300 ݙینہہ دے خصوصی منصوبے تے کم کریندی پئی اے اتے ساکوں آوݨ والی نسلاں کوں محفوظ پاکستان ݙیوݨ کیتے ودھ اقدامات کرݨے پوسن۔