نینگراں کوں اے آئی دی تربیت ڈے کراہیں زراعت، صنعت، تجارت سمیت ہر شعبے اچ انقلاب برپا کیتا ون٘ڄ سگدے، وزیراعظم شہباز شریف دا انڈس اے آئی ویک 2026 دی افتتاحی تقریب نال خطاب

اسلام آباد۔ 9 فروری (اے پی پی) وزیراعظم محمد شہباز شریف 2030ء تئیں مصنوعی ذہانت (اے آئی) دے شعبے اچ ہک ارب ڈالر خرچ کرݨ، اے آئی دا نصاب تیار کرݨ، اے آئی اچ پی ایچ ڈی کیتے ہک ہزار وظائف ڈیوݨ، آئی ٹی تے اے آئی دے حوالے نال استعداد اچ اضافے کیتے قومی سطح تے پروگرام شروع کرݨ دا اعلان کریندیں ہوئیاں آکھیا جو نوجواناں دی وڈی آبادی کوں اے آئی دی تربیت ڈے کراہیں زراعت، صنعت، تجارت سمیت ہر شعبے اچ انقلاب برپا کیتا ون٘ڄ سگدے اتے پاکستان اقوامِ عالم اچ ہک نمایاں مقام پیدا کر سگدے۔ اے ڳالھیں انھاں سنوار کوں اتھاں “انڈس اے آئی ویک 2026” دی افتتاحی تقریب نال خطاب کریندیں ہوئیاں کیتا۔ ایں موقع تے گورنر سندھ دے علاوہ احسن اقبال، شزا فاطمہ خواجہ، عطا اللہ تارڑ سمیت وفاقی وزراء، دوست ملکاں دے سفارتی و اعلیٰ سرکاری حکام وی موجود ہن۔ وزیراعظم محمد شہباز شریف آکھیا جو انڈس اے آئی ویک ایونٹ ملک دے ٹیکنالوجی دے منظرنامے کوں بدل ڈیسی، اے ایونٹ عالمی سطح تے پاکستان کوں ہک مضبوط پارٹنر دے طور تے سامݨے گھن آسی۔ انھاں ڈسایا جو بطور وزیراعلیٰ پنجاب سابق وزیراعظم محمد نواز شریف دی قیادت اچ تے انھاں دے وژن دے تحت انھاں تعلیم، صحت، محصولات تے نوجواناں دی ترقی کیتے کئی اہم منصوبے شروع کیتے، بطور وزیراعلیٰ پنجاب انھاں آئی ٹی دے شعبے تے خصوصی توجہ ڈتی تے پنج لکھ ہونہار طلبہ کوں لیپ ٹاپس ڈتے، اوں وقت پنجاب اچ ای لائبریریز دا آغاز کیتا جڈاں کہیں ایں بارے سوچیا تک نہ ہئی، لاہور اچ پہلا سیف سٹی منصوبہ تے ملک دی پہلی آئی ٹی یونیورسٹی وی ایں دور وچ قائم کیتی گئی، پنجاب لینڈ ڈیجیٹلائزیشن پروگرام دے ذریعے اراضی دے ریکارڈ دی شفافیت کوں یقینی بݨایا گیا، لینڈ ریکارڈ اچ اصلاحات نال کرپشن دا خاتمہ ممکن تھیا تے ریونیو افسراں دی بدعنوانی کوں ختم کیتا گیا، ای اشٹام پیپرز دا اجراء کر تے آمدن اچ اضافہ کیتا۔ وزیراعظم آکھیا جو فیڈرل بورڈ آف ریونیو (ایف بی آر) دی مکمل ڈیجیٹائزیشن نال محصولات دی وصولی اچ شفافیت ممکن تھئی، سمگلنگ دی روک تھام کیتے جدید سکینرز تے آلات پورٹس تے نصب کیتے گئے۔ انھاں آکھیا جو پاکستان دی 24 کروڑ آبادی اچ 60 فیصد نوجوان ہن، انھاں کوں جدید علم تے مہارت نال لیس کرݨا وقت دی لوڑھ اے۔ وزیراعظم آکھیا جو پاکستان ہݨ مصنوعی ذہانت دے شعبے اچ عالمی سطح تے قدم رکھݨ کیتے تیار اے، دیہی علاقیاں تئیں پڄے اتے نوجواناں کوں جدید علم تے تکنیکی مہارت فراہم کیتی۔ وزیراعظم ہک ملین غیر آئی ٹی پروفیشنلز کوں اے آئی اچ تربیت فراہم کرݨ، 1000 مکمل فنڈڈ پی ایچ ڈی سکالرشپس اے آئی دے شعبے اچ ڈیوݨ تے وفاق دے علاوہ آزاد جموں و کشمیر، گلگت بلتستان تے بلوچستان دے پسماندہ علاقیاں وچ وی اے آئی دی تعلیم و نصاب متعارف کراوݨ تے 2030ء تئیں اے آئی دے شعبے اچ ہک ارب ڈالر سرمایہ کاری دا اعلان کیتا۔ وفاقی وزیر آئی ٹی شزا فاطمہ انڈس اے آئی ویک 2026 نال خطاب کریندیں ہوئیاں آکھیا جو پاکستان ڈیجیٹل انقلاب دی طرف عزم نال ودھدا پئے، ڈیجیٹل نیشن پاکستان ایکٹ دے تحت قومی ڈیجیٹل روڈ میپ تیار کیتا گیا، وزیراعظم دی سربراہی اچ نیشنل ڈیجیٹل کمیشن قائم کیتا گیا، پاکستان ڈیجیٹل اتھارٹی ملک گیر ڈیجیٹل ماسٹر پلان بݨیندی پئی اے، ڈیٹا، سائبر سکیورٹی تے اے آئی کیتے واضح گورننس فریم ورک تشکیل ڈتا گیا۔ انھاں آکھیا جو پاکستان دی پہلی قومی اے آئی پالیسی ستمبر 2025ء اچ متعارف کرائی گئی، 2026ء اچ اے آئی پالیسی تے عملدرآمد دا آغاز کیتا گیا، انڈس اے آئی ویک نال یونیورسٹیاں، سٹارٹ اپس تے عالمی کمپنیوں اچ تعاون ممکن تھیسی۔ انھاں ڈسایا جو ڈیجیٹل سکلز پروگرام نال بنیادی اے آئی مہارت فراہم کیتی ویندی پئی اے، عوامی خدمات دے شعبیاں کوں ڈیجیٹائز کیتا ویندا پئے، ٹیکس نظام اچ اے آئی ٹریک اینڈ ٹریس نال شفافیت اچ اضافہ تھیا۔ انھاں زور ڈتا جو نجی شعبہ ڈیجیٹل تبدیلی دی قیادت کرے، پاکستان جدت، علم تے ترقی دا سفر جاری رکھیسی۔وفاقی وزیر منصوبہ بندی تے ترقی احسن اقبال خطاب وچ آکھیا جو اے آئی اج دے دور دی سب توں وݙی لوڑھ اے، سابق وزیراعظم نواز شریف دی قیادت اچ پاکستان کوں ڈیجیٹل ترقی دے راہ تے پایا، سائنس، ٹیکنالوجی تے آئی ٹی دے شعبے اچ بھرپور کم کیتا، وژن 2025 دے تحت آئی ٹی دے شعبے تے خصوصی توجہ رکھی گئی، اساں آپݨے سابق ادوار اچ تھری جی تے فور جی لائسنس جاری کیتے۔ وژن 2025 دے تحت پاکستان کوں چوتھے صنعتی انقلاب کیتے تیار کیتا گیا، آئی ٹی، اے آئی تے ایں نال جڑے ٻئے شعبیاں دے سینٹرز قائم کیتے گئے، سائبر سکیورٹی دا نیشنل سینٹر قائم کیتا گیا، انھاں سینٹرز دے قیام دا مقصد انھاں شعبیاں اچ خودکفالت حاصل کرݨ اے۔ انھاں آکھیا جو وزیراعظم شہباز شریف دی قیادت اچ اے آئی نال متعلق نیشنل ٹاسک فورس قائم کیتی گئی جئیں پاکستان دی پہلی قومی اے آئی پالیسی دے اجراء اچ اہم کردار ادا کیتا، معرکہ حق اچ کامیابی دے بعد ہݨ اساکوں معرکہ ترقی دے اہداف حاصل کرݨے ہن۔