ایوانِ بالا اجلاس، اسلام آباد اچ 6 فروری کوں تھیوݨ والے خودکش حملے دی شدید مذمت، متفقہ قرارداد منظور

اسلام آباد۔ 9 فروری(اے پی پی) ایوانِ بالا سنوار کوں اسلام آباد اچ 6 فروری کوں تھیوݨ والے خودکش حملے دی شدید مذمت کریندے متفقہ قرارداد منظور کر ڳھدی جیندے اچ واقعے دی شفاف اتے ویلھے سر تحقیقات کیتے عدالتی کمیشن قائم کرݨ دا مطالبہ کیتا گیا۔ قرارداد اچ آکھیا گیا جو اسلام آباد اچ معصوم شہریاں کوں نشانہ ٻݨاوݨ والا اے ہولناک حملہ قابلِ مذمت اے جیندے اچ قیمتی جاناں دا ضیان تھئے اتے کئی ڄݨے زخمی تھئن۔ ایوان متاثرہ خانداناں نال ہمدردی کریندے زخمیاں دی تکھے صحت یابی کیتے دعا کیتی۔ سینیٹ واضح کیتا جو شہریاں، عوامی جاہیں تے مذہبی اجتماعات کوں نشانہ ٻݨاوݨا اسلام، انسانیت اتے آئینِ پاکستان دے اقدار دے خلاف اے۔ قرارداد اچ قانون نافذ کرݨ والے اداریاں اتے امدادی ٹیماں دی ویلھے سر کارروائی کوں وی خراجِ تحسین پیش کیتا گیا۔ ایوانِ بالا حکومت توں مطالبہ کیتا جو حملے دی مکمل، شفاف اتے مقررہ مدت اچ تحقیقات کیتیاں ونڄن اتے دہشت گردی کرݨ والے بندیاں، سہولت کاراں اتے سرپرستاں کوں قانون دے مطابق سزا ݙتی ونڄے۔ قرارداد اچ وفاقی دارالحکومت سودھا حساس جاہیں تے سکیورٹی اتے انٹیلی جنس رابطیاں کوں ٻیا تکڑا کرݨ تے وی زور ݙتا گیا۔ قرارداد دے مطابق واقعے دی جامع تحقیقات کیتے فوری طور تے عدالتی کمیشن ٻݨایا ونڄے اتے اوندی رپورٹ چار ہفتیاں دے اندرو سینیٹ اچ پیش کیتی ونڄے۔