پاکستان دے ثقافتی ورثے دے تحفظ کیتے فلم، موسیقی تے تخلیقی کہانی نویسی دا فروغ ضروری اے، وفاقی وزیر اورنگزیب کھچی

اسلام آباد۔ 10 فروری (اے پی پی) وفاقی وزیر برائے قومی ورثہ تے ثقافت ڈویژن اورنگزیب خان کھچی معروف اداکارہ میرا کوں یقین دہانی کرائی جو انھاں دی درخواست تے انھاں کوں خیر سگالی سفیر مقرر کیتا ویسی۔ اے یقین دہانی وفاقی وزیر آپݨے دفتر اچ تھیوݨ آلی ملاقات دے دوران کرائی۔ ایں موقع تے وزیرِ ثقافت اداکارہ میرا تے فلم پروڈیوسر سلمان بٹ دی پاکستانی سینما دے فروغ تے مقامی فلماں کوں عالمی سطح تے متعارف کراوݨ اچ خدمات کوں سراہیا۔ اورنگزیب خان کھچی سلمان بٹ دے بیرونِ ملک رہݨ آلے پاکستانیاں کیتے فلماں بݨاوݨ دے قدم کوں سراہیا اتے اینکوں قومی فلم انڈسٹری دی بحالی کیتے ہک مثبت قدم قرار ݙتا۔ وفاقی وزیر آکھیا جو اگرچہ فلماں دا شعبہ وزارتِ اطلاعات و نشریات دے دائرہ اختیار آچ آندے پر وزارتِ ثقافت وی آپݨے دائرہ کار اچ رہندے ہوئیں ہر ممکن تعاون فراہم کریسی۔ ملاقات دے دوران نویں فلم “سائیکو” تے وی تفصیلی گالھ مہاڑ کیتی گئی جو تکھے ریلیز تھیوݨ آلی اے۔ بعد اچ سیکرٹری قومی ورثہ و ثقافت ڈویژن اسد رحمان گیلانی کوں فلم دے حوالے نال تفصیلی بریفنگ ݙتی گئی۔ اداکارہ میرا وزیر تے سیکرٹری دا شکریہ ادا کیتا۔