ورلڈ ڈیفنس شو 2026: پاک فضائیہ دے جے ایف-17 بلاک تھری اتے سپر مشاق دی شرکت

اسلام آباد۔ 10 فروری(اے پی پی) پاک فضائیہ دا دستہ سعودی عرب اچ تھیوݨ والے ورلڈ ڈیفنس شو 2026 اچ شریک اے جیندے اچ پی اے ایف دے جدید ترین جے ایف-17 تھنڈر بلاک تھری ملٹی رول فائٹر طیارے اتے عالمی سطح تے منّے ہوئے سپر مشاق تربیتی طیارے ݙکھائے ڳئن۔ ورلڈ ڈیفنس شو 2026 دفاع اتے سلامتی دے شعبے اچ ہک وݙی عالمی حیثیت رکھدے۔ ایں نمائش اچ پاک فضائیہ دی شرکت ایروسپیس جدت، آپریشنل قابلیت اتے قابلِ اعتماد دفاعی معاملات دے ابھردے ہوئے مرکز دے طور تے پاکستان دی عالمی پوزیشن کوں ٻیا تکڑا ٻݨیندے۔ ترجمان پاک فضائیہ دے مطابق ورلڈ ڈیفنس شو 2026 اچ شرکت پاکستان دی تیزی نال ترقی کریندی مقامی ایروسپیس صنعت اتے پی اے ایف دی آزمودہ عملی صلاحیتاں دی عکاسی کریندی اے۔ جے ایف-17 بلاک تھری پاکستان دی عسکری ہوابازی ٹیکنالوجی دا اعلیٰ ترین مظہر اے اتے جدید ایویانکس، اے ای ایس اے ریڈار، موثر الیکٹرانک وارفیئر نظام اتے بی وی آر میزائل ڄھئیں جنگی صلاحیتاں نال لیس اے جیڑھا ایکوں جدید فضائی افواج دی لوڑھ کوں پورا کرݨ والا ہک طاقتور 4.5 جنریشن فائٹر طیارہ بݨیندے۔ ایندے نال نال سپر مشاق تربیتی طیارہ پائلٹ ٹریننگ دے میدان اچ پاکستان دی مضبوط صلاحیتاں دا ثبوت اے۔ اپݨی قابلِ اعتماد کارکردگی، گھٹ لاگت اتے سوکھی ݙیکھ بھال پاروں سپر مشاق کوں کئی دوست ملک اپݨی فضائی افواج اچ رلا چکین اتے اے دنیا بھر اچ بنیادی پرواز دی تربیت کیتے ہک معیاری پلیٹ فارم دے طور تے خدمات انجام ݙیندا پئے۔