وزیر خزانہ و محصولات دا وزیراعظم دے “فین ری پلیسمنٹ پروگرام” کیتے وزارت خزانہ ولوں تعاون دا اعادہ

اسلام آباد۔12فروری(اے پی پی) وفاقی وزیر برائے خزانہ و محصولات سینیٹر محمد اورنگزیب وزیراعظم دے “فین ری پلیسمنٹ پروگرام” (پنکھے بدلݨ دا پروگرام) کیتے وزارت خزانہ ولوں مکمل تعاون دا عزم دوہریندے ہوئیں ایکوں توانائی دے تحفظ، مالیاتی ذمہ داری اتے ماحولیاتی اہداف دے حصول کیتے ہک اہم قدم قرار ݙتے۔ اسلم آباد اچ “فین ری پلیسمنٹ پروگرام” دی تقریب نال خطاب کریندے وزیر خزانہ آکھیا جو وزارت خزانہ منصوبے کوں وݙی ترجیح ݙیندی اے اتے وزارت خزانہ پاور ڈویژن دا پورا ہتھ ونݙیسی جو اے پروگرام موثر تھیوے، وزارت خزانہ بجٹ اچ ݙو ارب روپے رکھین جیڑھے 10 فیصد “فرسٹ لاس رسک گارنٹی” دے طور تے استعمال تھیسن۔ ایں اقدام دا مقصد بینکاں کوں ایں پروگرام اچ شامل تھیوݨ دی ترغیب ݙیوݨ اے تاں جو او پکھے بدلݨ کیتے درخواست ݙیوݨ والے صارفین کوں سوکھ نال فنانسنگ ݙے سڳن۔ انہاں آکھیے جو ایں پائلٹ مرحلے اچ 11 بینک شامل ہین اتے ہݨ تئیں تقریباً 186 توانائی بچاوݨ والے پکھے لائے ونڄ چکین جݙاں جو تقریباً 13 لکھ 50 ہزار روپے دی تقسیم 67 مستفید تھیوݨ والے لوکاں کوں کر ݙتی اے، ڈیجیٹل نظام، درخواست اتے ادائیگی دا طریقہ کار مکمل طور تے فعال تھی چکیے۔ انہاں وفاقی وزیر برائے توانائی اویس احمد لغاری دی قیادت کوں سراہیندے آکھیے جو اڳلا مرحلہ ایں پروگرام کوں سٹیٹ بینک اتے ٻئے بینکاں دے تعاون نال تیزی نال ودھاوݨ اے تاں جو ایندے فائدے 10 سال دے انتظار دے بجائے جلدی عوام تئیں پڄن۔