وفاقی وزیر عبدالعلیم خان دا ایم 9 موٹروے حادثے دا سخت نوٹس، زائد المعیاد ٹائراں آلیاں گاݙیاں تے پابندی دی ہدایت

اسلام آباد۔ 13 فروری(اے پی پی) وفاقی وزیرِ مواصلات عبدالعلیم خان ایم 9 موٹروے تے تھیوݨ والے المناک حادثے دا سخت نوٹس ڳھندے آئی جی موٹرویز توں فوری تحقیقاتی رپورٹ منڳی اے اتے آکھیے جو انسانی جاناں دے تحفظ تے کوئی سمجھوتہ نا کیتا ویسی۔ اپݨے بیان اچ وفاقی وزیر موٹروے پولیس کوں خصوصی احکامات جاری کریندے انہاں آکھیا جو موٹروے تے آوݨ آلی ہر گاݙی، خاص طور تے کمرشل گاݙیاں دے ٹائراں دے معیار دی سختی نال پڑتال کیتی ونڄے، پراݨی یا زائد المعیاد ٹائراں آلی کہیں گاݙی کوں موٹروے تے نا آوݨ ݙتا ونڄے اتے موٹر وے تے فٹنس دا معیار یقینی ٻݨایا ونڄے۔ عبدالعلیم خان ایم 9 موٹروے حادثے کوں افسوسناک قرار ݙیندے متاثرہ خانداناں نال ہمدردی کیتی اتے آکھیے جو اڳو تے اینڄھے حادثیاں کوں روکݨ کیتے حفاظتی اقدامات مزید سخت کیتے ویسن۔