وزیراعظم شہباز شریف دی آسٹریا دے کاروباری طبقے کوں پاکستان دے مختلف شعبیاں اچ سرمایہ کاری دی دعوت

ویانا۔ 16 فروری (اے پی پی) وزیراعظم محمد شہباز شریف آسٹریا دے کاروباری طبقے کوں زراعت، آئی ٹی، معدنیات تے کان کنی، سیاحت، ٹیکسٹائل و لیدر، قابلِ تجدید توانائی، انجینئرنگ سمیت مختلف شعبیاں اچ سرمایہ کاری دی دعوت ڈیندیں ہوئیاں آکھیا جو آسٹریا دے سرمایہ کار پاکستان آوݨ، حکومت انھاں دی میزبانی کریسی، ڈوہیں ملکاں اچ تعاون تے ݙوپاسہ تجارت دا حجم ودھاوݨ دے وݙے موقع موجود ہن۔ اے ڳالھیں انہاں سنوار کوں اتھاں پاکستان-آسٹریا بزنس فورم توں خطاب کریندے ہوئیاں کیتا۔ ایں موقع تے نائب وزیراعظم اسحاق ڈار، عطا اللہ تارڑ، طارق فاطمی دے علاوہ ڈوہیں ملکاں دی نمایاں کاروباری شخصیات وی موجود ہن۔ وزیراعظم ڈوہیں ملکاں دے درمیان مضبوط بنیاداں تے قائم طویل دوستانہ تعلقات دا ذکر کریندیں ہوئیں آکھیا جو آسٹرین کمپنیاں ݙہاکیاں توں پاکستان اچ کم کریندیاں پئن پر پچھلے کجھ عرصے اچ ایندے اچ ڳھٹکی آئی، قابلِ تجدید توانائی تے کان کنی اچ کئی آسٹرین کمپنیاں پاکستانی شراکت داراں نال رل تے کم کریندیاں پئن۔ انھاں چانسلر کرسچئین اسٹاکر نال ݙوپاسہ مذاکرات کوں مثبت تے تعمیری قرار ݙتا۔ وزیراعظم آکھیا جو پاکستان دی آبادی دا 60 فیصد نوجواناں تے مشتمل اے جیہڑے ٻہوں باصلاحیت ہن، حکومت آئی ٹی دی تعلیم تے تربیت کیتے کوششاں کریندی پئی اے۔ وزیراعظم آکھیا جو پاکستان دی معیشت دا وݙا انحصار زراعت تے اے، اساں زرعی ٹیکنالوجی تے فی ایکڑ پیداوار ودھاوݨ کیتے کوششاں کریندے پئیوں اتے ایں شعبے اچ آسٹریا دے تعاون کوں خوش آمدید آکھسوں۔ انھاں مختلف شعبیاں اچ آسٹریا دی بزنس کمیونٹی کوں سرمایہ کاری دی دعوت ݙیندیں ہوئیاں آکھیا جو اپریل اچ پاکستان ای بزنس فورم دا اسلام آباد اچ تھیسی۔ انھاں آسٹرین سرمایہ کاراں تے زور ݙتا جو او حکومت دی دعوت تے پاکستان آوݨ اتے سرمایہ کاری دے موقعیاں دا جائزہ گھنݨ۔ ایں توں پہلے اسحاق ڈار وی بزنس فورم توں خطاب کیتا اتے آکھیا جو وزیراعظم دی قیادت اچ معاشی سفارتکاری تے توجہ اے اتے پاکستان آپݨے محل وقوع پاروں ہک اہم مارکیٹ اے۔