پاکستان، مصر، اردن، متحدہ عرب امارات، انڈونیشیا، ترکیہ، سعودی عرب تے قطر دی مقبوضہ مغربی کنارے کوں ’’سٹیٹ لینڈ‘‘ قرار ڈیوݨ تے غیر قانونی آباد کاری دی سرگرمیاں دی مذمت

اسلام آباد۔ 17 فروری (اے پی پی) پاکستان، مصر، اردن، متحدہ عرب امارات، انڈونیشیا، ترکیہ، سعودی عرب تے قطر دے وزرائے خارجہ ہک مشترکہ بیان اچ مغربی کنارے کوں ’’سٹیٹ لینڈ‘‘ قرار ڈیوݨ تے غیر قانونی آباد کاری دی سرگرمیاں دی شدید الفاظ اچ مذمت کیتی اے۔ منگل کوں دفترِ خارجہ ولوں جاری بیان دے مطابق اے وزرائے خارجہ اسرائیل دے ایں فیصلے دی سخت مذمت کریندے ہن جیندے تحت مقبوضہ مغربی کنارے دی زمیناں کوں ’سٹیٹ لینڈ‘ قرار ݙتا ڳئے۔ بیان دے مطابق اے غیر قانونی اقدام ہک سنگین اشتعال انگیزی اے جیندے نال فلسطینی زمیناں تے قبضہ مستحکم کرݨ دی کوشش کیتی ڳئی اے جیہڑی فلسطینی عوام دے جائز حقوق کوں نقصان ݙیندی اے۔ وزرائے خارجہ ایں گالھ دا اعادہ کیتا جو اے اقدامات بین الاقوامی قانون، چوتھے جنیوا کنونشن تے اقوامِ متحدہ دی سلامتی کونسل دی قرارداداں دی واضح خلاف ورزی ہن۔ انھاں بین الاقوامی برادری توں مطالبہ کیتا جو او آپݨی ذمہ داریاں ادا کرے تے انھاں خلاف ورزیاں کوں روکݨ کیتے موثر اقدامات کرے۔