لاہور ۔ 8 فروری (اے پی پی) قومی کرکٹ ٹیم دے ہیڈ کوچ مکی آرتھر ساﺅتھ افریقہ دے خلاف ٹیسٹ ،ون ڈے اتے ٹی ٹونٹی سیریزاچ شکست دی ذمہ داری کہیں ہک تے سٹنڑ یا آپ قبول کرنڑ دی بجائے ساریں کوں برابر قصور وار قرار ڈتے۔قذافی سٹیڈیم اچ میڈیا نال الویندے ہوئیں انہاںا ٓکھیا جو شکست دے اساں سارے ذمہ دار ہیں، جنوبی افریقہ اچ بیٹنگ کنڈیشنز اوکھیاں ہوندن بھل ساکوں ہر کنڈیشنز اچ چنگاں کھیڈنڑ اتے ٹیسٹ فارمیٹ اچ بہتری کرنڑدی لوڑھ اے۔ انہاں آکھیا جو ورلڈ کپ اچ پاکستان ٹیم دا بہترین کمبی نیشن بنڑیسوں جیندے کیتے چیف سلیکٹر انضمام الحق نال صلاح مشورہ تھیندا راہندے،جنوبی افریقہ دے خلاف تھیونڑ آلیاں غلطیاں کوں آسٹریلیا دے خلاف سیریز اچ نہ دوہریسوں، ایں سیریز اچ ورلڈ کپ کیتے پوری منصوبہ بندی کیتی ویسی جیندے بعد انگلینڈ دی سیریز کیتے فائنل تھیونڑ آلے پندرھاں کھیڈاڑی ہی ورلڈ کپ دی ٹیم دا حصہ ہوسن ۔مکی آرتھر قومی ٹیم دے کپتان سرفراز احمدولوں افریقی کھیڈاڑی کوں ریمارکس تے آکھیا جو اے چنگی گالھ نہ ہئی بھل معافی منگنڑتوں بعد سرفراز چار میاچاں دی پابندی دی سزا وی بھگت چکین ہنڑ ایندے تے بئی گالھ نئیں تھیونڑی چاہیدی۔
