اسلام آباد ۔ 7 مئی (اے پی پی) معروف چولستانی سنگر کرشن لعل بھیل گزریل ڈینھ رحیم یار خان اچ جھوک لڈا گئن ، او ہک عرصے توں گردے دے عارضے اچ مبتلا ہن تے رحیم یار خان ہسپتال اچ ڈیلاسز دے سلسلے اچ داخل ہن ۔انہاں دے فوت تھیونڑ نال سرائیکی وسیب خصوصاً چولستان اچ صفِ ماتم وچھ گئی اے ۔ کرشن لعل بھیل انڈیا اتے دبئی سمیت مختلف ملکاں اچ اپنڑے فن دا مظاہرہ کیتا ۔ لوک ورثہ ، الحمرا ، پی این سی اے اتے بئے اداریں توں ایوارڈ گھدے ، گائیکی دے نال نال و موسیقار وی ہن ،انہاں بہوں سارے شاگرد پیدا کیتے تے انہاں کوں موسیقیت دے فن بارے ڈسایا۔ کرشن لعل بھیل 1965ئاچ لعل ناتھ دے گھر ضلع رحیم یارخان دے چولستانی علاقے اچ جمیے ۔ کرشن لعل بھیل دے فوت تھیونڑ تے تعزیت دا اظہار کریندے ہوئیں سرائیکستان قومی کونسل دے صدر ظہور دھریجہ آکھیے جو وسیب دے فنکار سسک تے مردے پئن ،اساں ہک عرصے توں کرشن لعل بھیل دے سرکاری خرچے تے علاج کیتے مطالبہ کریندے آیوں لیکن حکومت توجہ نہ ڈتی۔ کورونا لاک ڈاﺅن دی وجہ توں عام بندے دے نال نال وسیب دے فنکار دی ودھ سارے متاثر تھئن ۔انہاں آکھیے جو عالمی شہرت یافتہ چولستانی سنگر فقیرا بھگت وی 11 مئی 1999ءکوں یرقان دے مرض پاروں فوت تھئے ہن او وی چولستان اچ پانڑیں دی کمی دا شکار تھئے تے کرشن لعل بھیل دی بیماری دا باعث وی پانڑی دی کمی ہئی ۔اساڈا مطالبہ اے جو وزیراعلیٰ کرشن لعل بھیل دے لواحقین دی مالی مدد کرن تے چولستان اچ پانڑیں دے کمی دے مسلئے حل کیتے ونجن تے بلا تاخیر سرائیکی صوبہ بنڑایا ونجے تاں جو وسیب دے لوک اپنڑے مسئلے خود حل کرسگن تے سویب دے ادیب شاعر تے فنکار بے بسی دی موت مرنڑ توں بچ سگن
